Dear Atty. Divine,
Nag-file ko og kaso batok sa akong silingan tungod sa iyang pagdaut sa akong dungog, pinaagi sa pagpakatap og estorya batok kanako. Nag-abot mi sa barangay, apan wa mi mahusay tungod kay at that time, naglagot pa ko sa iyang gibuhat ug wa sab gani siya mangayo og pasaylo hinungdan nga ako gyud nga gipadayon ang pagpasaka og kaso batok kaniya ug pending na kini karon sa korte. Apan nawad-an na ako og interest sa maong kaso attorney, kay kahibawo ko nga dugay ang proseso ug naluoy na sab ko sa akong silingan. Unsa may angayan nako nga buhaton aron di na mapadayon ang maong kaso? Hinaut nga imo ko nga matambagan sa angayan nako nga buhaton. — Joy
Dear Joy,
Kun final na ang imong desisyon, mahimo ka nga mo-execute og Affidavit of Desistance aron sa pag-withdraw sa imong kaso. Lain nimo nga option mao ang paghimo og Amicable Settlement nga pirmahan ninyong duha sa silingan nimo nga imong gikiha ug inyong iduso sa korte aron aprobahan ang maong settlement ug ikonsiderar ang kaso nga naresolbar na human kamo nag-areglo. Husto ang imong desisyon nga pasayloon na lang siya ug i-withdraw ang imong kaso kay gawas nga dugay ang proseso, daghan intawon ang mga kaso nga nagtipun-og sa atong mga korte ug maayo na lang nga makuha-kuhaan kini. Sultii lang ang imong silingan nga di na kini niya buhaton pag-usab ug magsilbi niyang leksyon ang kaso nga imong gipasaka batok kaniya. Mas maayo nga moduol ka og abogado o sa Public Attorney’s Office aron imong mapahimo ang Affidavit of Desistance or Amicable Settlement. Thanks and Pit Senyor! - Atty Divine
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.