Maayong dawaton na lang sa wala’y kusmod ni Senador Grace Poe iyang kapildehan sa disqualification case nga gipakanaog sa Commission on Elections. Mas maayong mao kini iyang buhaton kay sa mag-eksibisyon siya og pangaway sa mga komisyoner sa Comelec.
Dili makaayo alang kang Poe ang iyang pagpasangil nga adunay "nagkunsabo" sa sulod sa Comelec aron lumpagon ang iyang kandidatura pagka-presidente. Lisod alang kaniya ang pagpangita og ebidensiya sa iyang giingong panagkunsabo.
Kini migawas human si Comelec Chairman Andres Bautista ug Commissioner Rowena Guanzon nagkalalis sa gisang-at nga tubag sa Comelec ngadto sa Korte Suprema. Apan kining bangi ni Bautista ug Guanzon problema ra kini nila isip mga komisyonado sa Comelec, wala’y kalibutan si Poe unsay tinuod.
Gawas pa, buringog si Poe sa ingon niining mga butang nga wala man gani siya makasabot nga igo ra gyud siyang giilad sa iyang ka-tandem nga gihinganlan na og "boy laglag."
Ang pamahayag ni Senador Chiz Escudero nga adunay komisyoner sa Comelec nga hulga sa demokrasya gibaslan ni Guanzon sa pag-ingon nga mas maayong mag-abogado na lang siya (Chiz) kang Poe kun tinuod nga maayong-laki siya.
Gi-esplikar usab ni Guanzon nganong gidalidali niya og sang-at ang "comment" ngadto sa Korte Suprema nga wala’y pirma ni Bautista. Matud ni Guanzon nga ang nag-file sa petisyon alang kang Poe ngadto sa Korte Suprema pinaagi diay sa Poblador-Bautista Law Office pinaagi sa igsuon ni Comelec chairman Bautista nga si Mario Bautista. Mao diay nga ganahan kaayo si chairman Bautista nga ma-consolidate tanang kaso ni Bautista kay aduna diay siya’y koneksyon sa kampo ni Poe.
* * *
Gidaog lang sa moot and academic ang temporary restraining order nga giisyu ni RTC Judge Soliver Peras batok sa siyudad sa Sugbo aron pugngan ang "reblocking" sa luna nga iya sa University of the Philippines sa Lahug.
Pero kun buot hunahunaon, kalapasan sa balaod ang gihimo sa mga opisyal sa siyudad pinaagi sa pagpanghilabot sa luna nga dili ila. Kasong kriminal, sibil, ug administratiba ang ilang atubangon kun molihok na ang UP batok kanila.
Apan maayong masayod ang mga tawo nga adunay "main case" niining TRO. Desisyonan pa sa korte ang kasong injunction batok sa siyudad aron pagpugong sa pagpatuman sa reblocking, apil na ang pag-apod-apod nila sa mga yuta ngadto sa mga residente nga dili mga tag-iya.
* * *
Sakto si Joel Mari Yu, ang kanhi hepe sa Cebu Investment and Promotion Center, nga maoy nag-manage sa South Road Properties kaniadto, nga ang halin sa mga luna dili angay ihurot og bayad sa utang niini, inay igasto kini aron palambuon ang Pond A aron mokita pa og dako. Kining gihimo ni Mayor Mike Rama klarong waldas ra gyud sa halin, kay wala’y tataw nga plano unsaon pagtarong og gamit sa halin sa SRP.