Hinaot madali

Sama sa lyrics nga "Bag-ong Tuig, Bag-ong Kinabuhi" sa kanta sa Pasko nga "Kasadya," hinaot may kabag-ohan sa Bag-ong Tuig, sa tuig sa mga unggoy --- ang 2016.

Usa sa mga kabag-ohan nga atong gipaabot mao ang paspas nga pag-atiman sa hudikatura sa daghang mga kaso nga natanggong sa nagkalain-laing korte.

Pait huna-hunaon ug dili malikayan nga makamahay ang kadaghanan nga may pinalabi sa pag-atiman sa nagkalain-laing kaso. Dili ikalimod nga bisan ang mga huwes ug mga kawani sa mga korte mangreklamo tungod sa kadaghan sa kaso nga ilang giatiman. Hapit matinuig ang settings sa mga kaso tungod sa kadaghan ug ka limitado sa mga huwes nga moatiman niini.

Kun sa lower courts limitado ang mga huwes taliwa sa naglaundok ug linibo nga mga kaso, sa mga tag-as nga ang-ang sa korte hinay usab ang dis-og sa mga nag-ung-ong nga mga kaso ilabi na sa mga nalambigit og mga prominenteng personalidad ug mga politiko.

Maabtan na lang sa eleksyon ug mapili na lang pag-usab ang mga opisyal nga gireklamo ug maduphan na lang sa Aguinaldo doctrine, ug matibway na ang mga kasong administratiba batok sa mga opisyal nga gipasanginlan ug napamatud-ang sad-an.

Hinaot nga dili mahisama ang kaso sa disqualification case batok ni Senador Grace Poe, nga maabtan na lang sa eleksyon dili pa mahatagan og katin-awan ang mga isyu batok sa senador.

Niepekto pa hangtod karon ang Temporary Restraining Order sa Korte Suprema sa desisyon sa Comelec en Banc sa pagbasura sa Certificate of Candidacy ni Poe tungod sa kakuwangan sa 10-year residency requirement ug sa pasangil nga dili siya natural-born Filipino tungod kay siya kinit-an ug sinagop lang sa mga artistang magti-ayon nga sila si Fernando Poe, Jr. ug Susan Roces.

Ang duha ka isyu pulos gilatid sa Batakang Balaod nga mga rekisito aron ang  usa ka kandidato mokalifikar sa pagdagan pagka-presidente sa Pilipinas.

Karong adlawa, gipaabot nga masugdan sa pagtuki sa mga mahistrado sa Korte Suprema ang apelasyon ni Poe sa hukom sa Comelec en Banc.

Samtang wala pa hingpit maprinta sa Comelec ang opisyal nga balota sa mga kandidato, hinaot mapaspasan sa Korte Suprema ang pagresolbar sa kaso ni Poe. Oras ang kontra sa mga mahistrado sa kaso sa senador. Ang kadiyot nga kalangay magpasabot og dugang kalibog ug posibleng kagubot ilabi na sa mga dumadapig ni Poe ug sa kinatibuk-ang proseso sa election.

Ang kalangay sa desisyon magpasabot og politikanhong kalibog. Maayo ra unta kun paborable ang desisyon alang ni Poe.