I belong to the old school. Sa ato pa, karaan nga tawo. Out of place na niining panahon sa kabag-ohan. Ug niining pag-abot sa karaan ug bag-ong kaliwatan, daghan ug dagko na kaayo ang mga kausaban.
Ang mga dautan sa unang mga panahon, karon, maayo na. Pananglitan, sa unang mga panahon, kun mosimba mag-ilis g’yud mi og maayo, gitawag nga Sunday’s clothes ang among isul-ob.
Apan karon, mag-shorts og “short” kaayo, mag-tsinelas, maora og padulong maligo sa dagat; ang mga babaye sexy kaayo, mag-display og bahin sa ilang lawas nga sa unang mga panahon, giisip nga scandal.
Karong mga panahona maayo na ni, dili na dautan. Mas kinahanglan mag-ilis ka og maayo kun mosulod sa Korte ug sa casino kay sa simbahan.
Ingon man, sa unang mga panahon, litikan ang among ngabil kun mamalikas.
Daku kaayo nga sala ang pamalikas alang sa among katigulangan, ug kanunay kaming gimaymayan bahin niini sa among mga magtutudlo sa elementarya hangtod na sa high school.
Apan karon, dili na kini daotan. Normal na. Nindot na kaayong paminawon. Ordinaryo na kaayo kini alang sa mga tigbalikas ug sa gibalikas. Mao na kini karon ang gikinahanglan.
Sa mga grocery pa, basic commodities na. Primary needs. Kun mamalikas ka, pakpakan ka og maayo, standing ovation pa. Pagkadungganan na gyud karon sa tawo nga mamalikas.
Si Archbishop Socrates Villegas, presidente sa CBCP namahayag: “Vulgarity is corruption,” apan karon, dili na. “People become beastly and barbaric,” apan karon, anghel na, ligdong na nga tawo.
Mipadayon si Villegas, nga sa imo kuno nga pagbalikas ni bisan kinsa “and the audience laugh, I can only bow my head and grieve in great shame. My countrymen has gone to the dregs.”
Wala na tay mahimo niini. It seems nga ang lungsod miisip na nga normal ug dili na dautan ang pagpamalikas. Alang sa mga bag-ong tubo, ug sa modernong generation, sayop ang atong katigulangan, ang karaang mga magtutudlo, sa ilang pagleksyon kanamo nga dautan ang pagpamalikas.
Ug tungod kay accepted ug gidawat na kini sa katawhan karon, gani, ang mga bata hanas ug mapasigarbuhon na kaayong mamalikas, let it be. Unta, dili kini makaapektar sa resulta sa umaabot nga presidential election.
Daghan na ra ba kaayong mga moral values sa unang panahon nga karon gisalikway na sa modernong henerasyon, giisip nga dili na applicable, passe’ na, old fashion, ug obsolete na.
Pastilan!