Welcome 2016 elections!

Mikilab lang ang Pasko. Ug karon, hapit na pud ang Bag-ong Tuig. Magbag-o na usab kita’g tuig. Alang kanako, dili na ko kaihap pila na ka Bag-ong Tuig ang milabay sa akong kinabuhi, nga wala nay distinction ug kalainan ang daan ug bag-o nga tuig. In most instances, ang mga kalendaryo ray mabag-o.

Ikaw, unsa may mabag-o nimo matag Bag-ong Tuig? Maghimo ba kini’g kabag-ohan ug kausaban sa imong kinabuhi?

Sa nagtungha pa mi sa elementarya hangtod sa high school, pabuhaton mi og mga New Year’s resolutions sa mga magtutudlo ug mga madre sa Saint Alphonsus Catholic School (SACS), sa Opon, karon Lapu-Lapu City, gidumala sa mga Benedictine Sisters.

Unya, mag-monitor dayon mi sa among kaugalingon kun amo ba nga natuman ang mga resolution. Backsliding ang labas. Apan, ang Bag-ong Tuig mihatag kanamo’g higayon paglingi sa among kagahapon ug paglantaw sa unahan unsay likayan ug unsay angay buhaton nga mga kinaiya, ug nakahatag kanamo og higayon paghimo’g accounting sa among kaugalingon.

Karon, di na ta kadungog nga duna pay maghimo og mga New Year’s resolution. Obsolete na ni. Wala na sa uso. Busa, tuloy ang ligaya, regardless unsa ang kagahapon, unsa ang ugma.

Kun sa matag tuig naghimo pa kita’g New Year’s resolution, unya, tumanon gyud, namenosan unta karon ang smuggling ug corruption. Kun matag-new year, naghimo pa kita’g pagbag-o sa atong kaugalingon, ilabi na sa anaa sa gobiyerno, limpiyo na unta ang atong mga election, wala na ang corruption, ug dili unta to mahanaw ang P10 bilyones gumikan sa pork barrel scam.

Numero uno natong suliran ang corruption. Nga kun sa nangaging mga Bag-ong Tuig, nag-resolve pa kita nga dili na mangawat sa salapi sa lungsod ug nagsubay sa daang matuwid, limpiyo na unta karon ang atong kagamhanan ug nagmauswagon na unta karon ang atong nasud.

Ato kuno nga sugdan karong 2016 ang hugot nga pag-resolve nga dili na ta mangurakot (mahimo kaha ni nato?) Siyaro, after a year or two, dili gyud ta mabuotan! Siyaro, after so many New  Year’s resolutions, mga kawatan ug mga tikasan lang gihapon ta. Ug magpili lang gihapon og kawatan nga Presidente.

Dili ta magsalig sa Commission on Audit. Let’s audit ourselves, then let’s resolve to do better, atong i-moderate ang atong greed. Mo-work pa man tingali ang paghimo’g New Year’s resolution, ug madutlan pa man tingali ang atong mga political leaders niini.

Ikaw ang magbuot niining tanan.