Pakigbisog sa balota
May istorya si Senador Chiz Escudero nga iyang gibalikbalik sa hapit tanan niyang interviews pagpasabot nganong masaligon ang ilang kampo nga mahinayon bisan sa giatubang nga upat ka disqualification cases ang kandidatura ni Senador Grace Poe sa pagka presidente: Usa ka party-list group nga di sama kainila ni Poe gi-disqualify sa Commission on Elections (COMELEC) apan gidapigan sa Korte Suprema niadtong 2013.
Matud ni Escudero ang leksiyon nga angay’ng makat-unan sa COMELEC sa ilang pagkapilde sa kaso sa party-list group mao nga, bisan gi-disqualify na nila si Poe sa duha ka kaso nga niabot sa COMELEC en banc angay gihapong iapil sa balota ang ngan ni Poe.
* * *
Gipatigbabaw sa Korte Suprema ang katungod sa party-list group pag-apil sa piniliay dayon nang Mayo 2013. Bitbit ang desisyon sa labaw’ng hukmanan, niatubang ang kadagkoan sa party-list group sa mga tagduma sa COMELEC aron pagpahibawo nga makaapil sila sa piniliay.
Apan nahuman na ang pagprinta sa mga balota. Di na mahimong usbon kay mameligro nga malangay ang piniliay. Igo na lang giingnan sa COMELEC ang party-list group sa pag-apil sa sunod nga piniliay. Bisan sa ilang kadaogan sa labing taas nga korte sa nasud, huyhoy ang abaga sa party-list group nga nidawat sa ilang kapalaran nga igo lang naglaway sa kahigayonan nga makalingkod sa Kongreso.
* * *
Matod ni Escudero di makaako ang COMELEC nga masubli ang eskandalo sa umaabot nga piniliay. Kun tangtangon gyod nila si Poe sa listahan sa mga magpapili pagka presidente, unsa may mahitabo kun ipatigbabaw sa Korte Suprema dayong piniliay sa Mayo sunod tuig ang katungod ni Poe pagdagan?
Nipasidaan si Escudero nga di mangiyugpos ang mga dumadapig ni Poe. Nga mas daghan kay sa mga sakop sa party-list group nga wa gani niya ilha. Ug may sukaranan silang moulbo. Tungod sa kadako sa inhustisya nga mahimo: Nga bisan tugotan na sa Korte Suprema di gihapon makaapil si Poe kay wa ang iyang ngan sa balota.
* * *
Ang mga pasidaan ni Escudero hanig nang daan kun mapakyas ang Korte Suprema pagluwat og temporary restraining order (TRO) batok sa hukom sa COMELEC pagtaktak ni Poe. Di tungod sa merito kon dili tungod sa kakuwang sa panahon – usa ug tunga sa adlaw rang trabaho sa mga hukmanan karong semanaha sa di pa magsugod ang taas nga bakasyon sa bag-ong tuig.
Nahukman sa Korte Suprema ang kaso ni anhing Fernando Poe Jr., amahan ni Senador Poe, niadtong Marso 2004, duha ka buwan sa wala pang piniliay apan duha ka buwan sab human naprinta ang mga balota. Nga gipanghinaot ni Poe nga masubli sa iyang kaso. Sa Mayo 9 pang piniliay presidensiyal. Apan karon pa lang, nakigbisog na si Poe sa iyang politikanhong kinabuhi.
* * *
- Latest
