EDITORYAL – Ang kadanghag

Ang dinagkotang kandila nga gipabarug lang sa plastik nga sudlanan sa mga sinena maoy nakamugna og dakong sunog nga miugdaw og dul-an sa 100 ka panimalay didto sa Barangay Lahug kaniadtong Sabado sa gabii. Maingon nato nga kun ang nagbutang niadtong kandila migamit pa sa iyang utok, dili unta mahitabo ang sunog. Ang kandila malanay gyud, ug kay plastik man ang iyang gipatindogan, masunog ra sab kini kun maupos na ang kandila.

Masabot kaayo nga kun dili lang magdanghag ang usa ka tawo, malikayan g’yud ang sunog. Adunay mga tawo nga ang dali kaayo nga moabot sa ilang huna-huna nga kun unsay makamugna og sunog, ila dayon kini nga wad-on.

Nahimo nga kontrobersiyal pag-ayo sa nangaging mga semana ang Butane-LPG canisters kay napasanginlan usab nga nakamugna og sunog bisan og wala’y basehanan.

Dali kaayo nga may mga tawo nga misugyot nga wad-on ug idili na ang paggamit og Butane-LPG canisters bisan pa man og nasayod sila nga kaliboan na ka pamilya ang apektado kun kini himuon.

Karon kay kandila man maoy nakaingon sa dakong sunog sa Barangay Lahug, kadtong maong mga tawo mosugyot na ba usab nga idili na sa kagamhanan ang paggamit og kandila?

Ang leksiyon niini mao nga bisan unsay gamiton basta dili lang magdinanghag, malikayan gayud ang sunog. Kinahanglan usab nga matag pamilya, mangandam gyud kanunay.

Bisan ang paggamit og sugnod gikan sa kahoy alang sa pagluto sa atong mga pagkaon, makamugna gihapon kini og sunog kun dili magmatngon ang tagbalay.

Sa laktud, ang sugyot nga wad-on sa hingpit ug dili na pagamiton ang katawhan og Butane-LPG canisters, usa ka lakang nga dinali-dali ug wala himoi og tukmang pagtuon aron wala’y daghang tawo nga maapike.