Pasayloa nga moambit ko bisan di takos sa kontrobersiya sa Miss Universe 2015. Pasayloa sab nga wa kong kakita og laing hisgotan, kay nahibawo kong mao say imong nadunggan nga mga istorya sukad pa niadtong Lunes. Hinaot nga sabton ta sa ubang kanasuran. Kay sila bay makakuha sa korona human sa 42 ka tuig nga huwaw, lalim ba.
Makasimpatiya ko sa kahimangod sa taga Colombia. Kun ang Pilipinas pa ang naa sa ilang nahimutangan, kun si Pia Wurtzbach pay unang nahatagan sa korona aron lang bawion ug ihatag og lain, mas nag-alintabo pa tingali ang akong kasuko karon. Di hinuon kong kadason sa ilang plano pagkiha sa mga tigpasiugda sa beauty pageant.
* * *
Ang mas sayo nga pagdawat sa Colombia sa kamatuoran makaayo sa tanang hingtungdan. Naa nila karon ang tanang pagsabot sa nagkalainlaing kanasuran sa kalibotan. Kay sila ang makaluluoy nga mga biktima sa bulilyaso. Apan mapapas ang tanang simpatiya kun mo-insistir sila nga ang sayop nga pahibawo maoy ipatigbabaw.
Mas dakong binuang ang sugyot ni Donald Trump, kandidato pagka presidente sa Estados Unidos nga kanhi tag-iya sa prangkisa sa Miss Universe, nga ang Colombia ug Pilipinas pulos ideklarar nga mga mananaog isip simbolo sa kalibutanong panaghigalaay. Ang dakong sayop di matul-id pinaagi sa pagpasiugda og lain nga mas dakong sayop.
* * *
Magpasalamat hinuon ta nga di China maoy nasaypan paghatag sa korona. Di makatabang sa tandugong relasyon sa Pilipinas ug China kining wa kinahanglana nga kontrobersiya. Maayo na lang nga wa tay problema sa Colombia. Gani nitambong ang ilang presidente nga si Juan Manuel Santos sa summit sa Asia Pacific Economic Conference (APEC) sa Manila sa niaging buwan.
May mga kabalaka hinuon nga kun ang Estados Unidos pay unang nadeklarar nga mananaog mahimong di na bakwion ang sayop. Wa hinuoy sukaranan ang pagduda. Mahimong kabahin na lang sa pagpangita og way kinutoban nga sumpay sa usa sa labing makauuwaw nga sipyat sa atong panahon.
* * *
Mahug nga way kapuslanan ang padayon natong pagsumsom sa kontrobersiya kun di makat-onan ang mosunod nga mga pagtulon-an:
Ang kakugi ug determinasyon ni Pia pagbuntog sa daghang kakulian maoy nakahatag niya sa tam-is nga kadaogan (wa unta maangkon ang korona kun nitahan pa human sa duha ka pilde niya sa Binibining Pilipinas);
Mas maayong angkunon ang sayop ug mangayo og pasaylo sa kasaypanan sa labing sayo nga kahigayonan (palandonga kun unsay nahitabo kun nagpaabot pa si Steve Harvey ug ang mga tigpasiugda og pila ka oras, gipatiwas gyod ang koronasyon, una gipahibawo ang sayop); ug
Labing maayong pasidungog nga atong mahatag sa kadaogan ni Pia mao ang pagtahud, paghigugma ug pagpalambo sa katungod sa kababayen-an sa atong mga pinuy-anan, mga buhatan, mga eskuylahan ug katilingban.
* * *