Ang sinukliay sa hagit nga "sampalan, suntokan at barilan" ang nagpakita kun unsa ka mabaw kining duha ka presidential contender nga sila si Mar Roxas ug Digong Duterte.
Pareho man unta sila nga mga edukado ug beterano nga sulogoon sa katawhan apan sa ilang gibuhat gikalimtan nila ang tanan nga nakat-onan ug gibutang kini sa ilang lapa-lapa ug gitumban.
Lupig pa nila ang mga maton o bugoy nga walay grado ug mga bata nga walay buot sa ilang gihimo.
Sumala pa ni kanhi presidente Fidel Ramos nga kinahanglan nga "world class" ang kalidad sa mamahimong lider sa nasud nga maoy mag-una nga mosungasong dili lang sa nasudnon, apan apil na sa pangkalibutanon nga kalihokan.
Kini nga hiyas, gipapas nilang Duterte ug Roxas kinsa angayan unta nga maoy magsilbe nga ehemplo sa katarong sa mga pulong ug sa buhat.
Mas maayo nga magbinayloay sila og mga pulong kalabot sa mga isyu nga adunay labot ang lungsod, ilabi na sa ilang mga plataporma de gobiyerno, aron mahimbisan sila sa mga tawo ug masayran ang ilang mga plano kun mapili sila sa puwesto.
Wala na lang ba gyud diay kita’y mapili nga tarong ug ligdong nga himoon nato nga lider? Aduna untay uban nga kapilian apan kwestyonable man ang citizenship, sama ni Grace Poe.
Si Miriam Santiago walay kasegurohan ang kahimtang sa panglawas, si Binay gikaligo usab ang mga kaso sa kurapsyon. Delikado kun sama nilang Roxas ug Duterte ang makalingkod sa kinatas-an nga pwesto sa gobiyerno kay mahimo na ang Pilipinas nga nasud sa mga palengkero, bugoy ug berdugo.
Kining duha ka presidential aspirants ang mga national “exshameful” este example sa pagpawalay class, nagpakaulaw lang!