“Kriminal” molingkud sa Malacañang?

Giangkon sa usa ka kandidato pagka presidente sa nasud nga daghan na nga tawo ang iyang gipatay.

Gawas niini, giangkon usab niya nga duha ang iyang asawa ug may duha pa gyud siya ka uyab.

Iya usab nga giangkon nga gibalikas niya ang Santo Papa kay nakamugna kini og traffic tungod sa iyang pagbisita sa nasud.

Ang kandidato nga akong gihisgotan mao si Davao City Mayor Rodrigo Duterte, kansang baba wa’y lipudlipod kun mamalikas.

Apan bisan sa iyang pagka mamamatay og tawo, pagka wa’y moralidad, pagkamalapason sa tawhanong katungod ug pagbalikas sa Santo Papa, taas gihapon ang iyang rating sa gipahigayong survey sa  pagka presidente sa nasud.

Dinhi makaingon kita nga dili lang diay ang klima ang nausab dinhi sa nasud, kun dili, nausab na pud diay ang matang sa pagpili og kandidato dinhi sa nasud.

Kini tungod kay kun kaniadto ang gusto nato nga mangulo sa nasud mao kadtong mga ligdong nga tawo, apan karon mao nay gusto natong mangulo kadto nang mamamatay og tawo, daghan og asawa ug may daghan pa nga uyab, malapason sa tawhanong katungod ug walay respeto sa Santo Papa.

Unsa kaha ang hinungdan kun ngano nga naingon niini kining tanan?