Imbes tabangan ang kabanayan sa nangamatay nga SAF 44 didto sa Mamasapano, Maguindanao aron makalimtan nila ang hitabo, may mga tawo hinoon nga gusto silang pahilakon pag-usab.
Ilang gigamit ang hulagway sa nagpasad nga patay’ng lawas sa mga sakop sa SAF 44 ug gi-upload kini sa Facebook, dayon gibasol ang hitabo ngadto ni kanhi DILG Secretary Mar Roxas aron kini dauton kay kandidato man pagka-presidente.
Sigurado nga gisakitan na usab ang kabanayan sa nangamatay’ng SAF 44 pagkakita nila sa hulagway sa ilang mga minahal nga wala’y mga sinena ug nangligdas daplin sa sapa kay gipangawat ang ilang uniporme sa nagpatay kanila.
Wala’y nagdili kanila sa paghimo’g paagi nga modaog ang gilabanan nila nga mga kandidato, apan dili usab maayo nga ang mga hulagway sa nangamatay’ng SAF 44 maoy ilang gamiton sa propaganda.
Posible pa nga masuko ang katawhan sa ilang gibuhat kay sa subra nila nga pagpaninguha aron dauton ang kandidatura sa kontra sa ilang gilabanang kandidato, gigamit nila ang hulagway sa makaluluoy nga SAF 44.
Gusto nga ipalutaw sa maong mga tawo nga si Mar Roxas angay gyud nga basulon sa pagkamatay sa SAF 44. Gipalutaw nila nga si Mar Roxas nasayod gayud sa maong operation pagdakop sa wanted nga terorista ug misangpot usab sa kamatayon sa daghang tropa. Bisan pa sa pagpasabot ni Roxas nga wala siya pahibaw-a sa maong operation, buot ipalutaw sa mga nag-upload sa hulagway nga angay gyud nga basulon si Roxas kay siya man ang secretary sa DILG.
Sa ilang paggamit sa hulagway sa makaluluoy nga SAF 44, ang ilang kandidato hayan yam-iran pa sa katawhan.