Police Action Officers

Sa dili madugay, dili na unya mahasol ang mga senior citizen ning dakbayan pagpasang-at sa ilang mga reklamo batok sa mga balay-patigayon nga mosupak sa Republic Act 9994, kon Expanded Senior Citizens Act of 2010, sa higayon nga ma-officially designated na ang kapolisan isip mga Senior Citizens Police Action Officers.

Sa briefing/training session nga gihimo diha sa conference room sa buhatan sa bise mayor, kapin sa 20 ka police officers gikan sa nagkalainlaing police stations ning dakbayan ang mitambong ug gibansay sila sa mga probisyon sa RA 9994, ug sa ilang kaakohan pagpatuman sa maong balaod.

Matud ni Doming Chaves, OSCA Head ning dakbayan sa Sugbo, nga ang tumong sa conference “was to brief, mentor, and train the police officers on the Senior Citizens Act, the primary law that protects and promotes the rights and privileges of the city’s senior population.”

Ang OSCA, uban sa laing mga buhatan sa gobiyerno nga nahilambigit pagpatuman sa RA 9994, mogama sa guidelines ug mechanics, pag-define sa kaakohan o papel sa police action officers tali sa mga reklamo nga ipadangat sa mga senior citizens batok sa mga establisemento nga dili mohatag og 20 porsiyento nga diskwento sa mga senior citizens.

Namulong sila si Bise Mayor Edgardo Labella, Cebu City Legal Officer Jerome Castillo, ug mga resource persons nga sila si Atty. Misty Leah Hupp sa Cebu Prosecutors’ Office; Ms. Gladys Oro, Senior Trade Industry Development Specialist sa DTI; ug Atty. Antonette D. Clamor sa BIR regional office.

Ang mga police stations aduna na unya’y mga senior citizen’s desks ug mga designated action officers nga maoy modawat ug motagad sa reklamo sa mga senior citizens batok sa mga mosupak sa Balaud 9994.

Usa sa gi-highlight sa seminar mao ang bahin sa pag-compute sa diskwento nga kun ang paliton balor og P100, i-deduct ang VAT exemption nga 12%, mahimo nang P89.29. Unya, i-deduct ang 20% nga diskwento, ang bayranan sa senior citizen gikan sa retail price nga P100, P71.43 na lang. Sa laktud, ang total nga discount, 32% gyud.

Laing gi-highlight mao ang mga penalties. First violation: multa nga dili mominus og P50,000, apan dili molabaw og P100,000, ug pagkabilanggo nga dili momenus sa duha ka tuig, apan dili molabaw sa unom ka tuig.

Sa mosunod nga mga violations: Multa: P100,000 apan dili molabaw og P200,000; ug bilanggo, duha ka tuig, apan dili molabaw og unom ka tuig.