Nagpanglad-ok sa laway!

Mura’g gibayaw sa langit sa kalipay ang mga casual ug regular nga empleyado sa Cebu City Hall human giaprobahan sa konseho ang Supplemental Budget No. 2.

Nasukip sa SB2 ang P127 milyones alang sa pinaskohan sa mga opisyal ug kawani sa City Hall nga tag P30 mil. Apan luyo sa hudyaka sa mga kawani mao usab ang pagpanglad-ok sa laway sa mga job orders o kadtong mga nagtrabaho nga per project lang sa dakbayan sanglit wala man sila maapil sa makadawat sa gihulagway nga labing dako nga christmas bonus.

Gipasabot ni City Treasuer Diwa Cuevas nga dili mahimo nga mahatagan og cash incentive ang dul-an sa usa ka libo ka JO’s tungod kay makwestyon kini sanglit wala may employer-employee relationship.

Hinuon, dili mouli nga empty handed ang mga JO’s tungod kay hatagan man sila og mga Christmas goodies sama sa bugas ug hamon.

Unta for humanitarian consideration ug sa espirito sa Pasko, bisan gipisikan na lang sila og P5 mil nga pinaskohan. Samtang upat  ka konsehal ang tag P10 mil lang ang ilang dawaton bisan og sila makahimo unta nga modawat og P30 mil nga bonus.

Apan i-release gihapon sa CTO ang kinatibuk-an nga kantidad ngadto kanila. Mas maayo seguro kun ang nahabilin nga tag P20 mil sa naasoy nga mga konsehal ila na lang ipaambit sa mga JO’s isip tam-is nga pinaskohan.

Kun himuon kini nila basin mosunod usab ang kauban nila sa konseho nga mo-share sa grasya nga ilang madawat ngadto sa  mga mas nagkinahanglan.