“No-el”

Malampuson ang tulo ka adlaw nga Assembly Test sa 1901st Infantry Brigade Ready Reserve niadtong Nobiyembre 29 ug 30 ug Disyembre 6.

Pinanguluhan ni Colonel Erik Espina, ang dul-an 80 ka Army Reservists mipahigayon sa tulo ka adlaw nga pagbansay alang sa environmental, disaster management, ug military training.

Ang Assembly Test gitapos sa usa ka medical mission sa Pawa, Dumanjug diin kapin sa 300 ka tawo apil mga bata ang naserbisyohan.

* * *

Nagkakusog karon ang kahadlok sa “no-el” kon “no election” sa Mayo sunod tuig human ang Korte Suprema misuspenso sa polisiya sa Comission on Elections nga “no bio, no boto” nga ang buot ipasabot kadtong wala makapa-biometrics dili makabotar.

Mga 2.5 milyones ang makabotar bisan wala makapa-biometrics kun tumanon ang mando sa Korte Suprema. Apan ang Comelec nagkanayon nga kun i-apil kadtong wala makapa-biometrics, daghang flying voters ang makabotar gihapon sa lainlaing presinto. Unya motaas ang linya kay bisan kadtong nagtinapolan pagpakuha sa biometrics, makabotar naman.

Apan ang Korte Suprema nagtan-aw sa constitutional rights sa tanan nga makabotar. Sa Konstitusyon ug sa balaod sa pagbotar, dili rason ang kawalay biometrics nga madid-an ang tawo nga makabotar.

Gubot kining “no-el” busa dili angayang suportahan. Ang kandidato nga dehado na daan ning mga panahona, sama ni Bise Presidente Jejomar Binay nga nag-atubang og daghang kasong pangurakot ug ni Senador Grace Poe nga apeke sa iyang kuwalipikasyon pagpuyo sa nasud, mosuporta gyud sila sa tinguhang wala’y eleksiyon.

Apan sa Philippine STAR kagahapon, si Presidente Noynoy Aquino mismo ang nanawagan nga idayon ang eleksiyon sa Mayo 2016 kay gusto na siyang manaog. Si Noynoy bukas nga nagsuporta sa manok sa Liberal Party nga si Mar Roxas.

* * *

Gisakyan pag-ayo sa mga walhong pundok ang isyu sa mga Lumad didto sa Mindanao.

Nakadawat ko og sulat gikan sa usa ka Kathrina Olalia alias Ka Mellisa nga mikondenar sa pagsakay sa walhong pundok nga nagsuporta sa NPA.

Niadtong Nobiyembre 1, milampos ang mga propagandista sa NPA pagdala sa mga Lumad didto sa Manila pinaagi sa ilang Manilakbayan 2015 aron himuong nasyonal ang pagtudlo nila sa mga sundalo nga mao kunohay nagpaluyo sa paramilitary group nga Magahat-Bagani nga gitudlong maoy mipatay sa mga lider sa mga Lumad.

Wala’y panghitabong naglambigit sa mga Lumad didto sa Manila, apan gamit ang mga koneksiyon sa University of the Philippines, milampos sila. Karon, ania na usab sa Sugbo aron mangayo og sempatiya sa mga Sugboanon.

Ang militar ang gipasanginlan nila nga nagpaluyo sa paramilitary. Pero wala’y ebidensiya. Gigamit sa mga walhon ang Lumad alang sa trial by publicity batok sa mga sundalong ilang gustong papahawaon.