Sumbalik sa pagsulbong

Sukwahi sa mga pangagpas nga moawop rang kasibaw sa mga dumadapig ni Davao City Mayor Rodrigo Duterte kun pormal nang modeklarar sa iyang kandidatura pagka presidente, padayon ang iyang pagsulbong sa duha ka sunudsunod nga surveys sa Pulse Asia sa Metro Manila ug dayon sa nasudnong survey sa Social Weather Stations (SWS) sa niaging buwan.

Mas seryuso nang pagtagad ang ihatag sa iyang mga kaatbang karon. Lahi sa nangaging mga semana nga giisip siyang kutob ra sa paukyab, di seryuso sa iyang pagdagan ug way katakos paglusad og nasudnong kampanya. Ang dakong labaw ni Duterte batok sa tanan niyang kaatbang segurong makapausab sa tono sa kampanya.

* * *

Angay hinuong hinumdoman ang mosunod nga mga sirkumstansiya sa survey: Gibayran sa wa ilhang negosyante sa Davao (mahimong dumadapig ni Duterte); wa dasoni apan wa sab ipanghimakak sa SWS ang resulta; ug giapil sa pangutana ang pagdeklarar nang Duterte sa iyang kandidatura.

Di sab angay’ng taligam-an ang mosunod: Minilyon ka pesos ang gasto sa nasudnong survey busa di kasarangang negosyante ang nagpasiugda; bisan kinsay nagbayad di makuwestiyon ang kaligdong sa surveys sa SWS; ug bisan si Duterte ray gihisgutan sa pangutana, di siya pilion sa mayoriya sa 1,200 ka respondents kun wa pa morehistro ang lahi niyang mga plataporma batok sa drugas, kriminalidad ug pangurakot.

* * *

Unsay implikasyon sa survey sa mga kaatbang ni Duterte? Ang dakong tidlom sa ratings ni Senador Grace Poe nagmatuod nga tandugon ang iyang suporta, mahimong maapektahan sa mahinungdanon kalamboan sa kampanya (sama sa iyang sipyat sa Iglesia ni Cristo ug sa kandidaturang Duterte). May politikanhong base si Bise Presidente Jejomar Binay, bisan nagkagamay na, nga matinud-anon niya bisan unsa pay mahitabo sa kampanya;

Bug-at ug birahunon gyud si kanhi Interior Secretary Mar Roxas bisan sa suporta ni Presidente Noynoy Aquino ug sa administrasyon; di kaugpo ang kandidatura ni Senador Miriam Defensor Santiago kun kutob ra sa social media ug sa Metro Manila.

* * *

Ang paghangop sa mga botante ni Duterte makapausab sa kalidad sa kampanya. Gikan sa madanihong motherhood statements, mapugos ang iyang mga kaatbang pagpresentar og dugang detalye unsaon pagduma ang nasud kun sila’y makabanos sa Malakanyang. Ganahan ang katawhan og kausaban ug ang mopasiugda kinahanglang takos ug may agi na.

Di hinuon padak-an pag-ayong Duterte ang iyang ngisi. Gipahigayon ang survey sa wa pa niya balikasa si Pope Francis. Gipaabot nga magbaha sab sa mosunod nga mga adlaw ang disqualification cases batok niya. Sa way paghisgot sa pagpanggawas na unya sa mga biktima ug mga ebidensiya (apil ang mga lehitimo ug ang mga binayran ug gimaniobra) sa pasangil sa mga pagpanglaktod sa balaod sa pila ka dekada niya nga pagduma sa Davao City. [email protected]