Karon ang hunahunaon (1)

Niaro'ng panahona, dili gayud kita kaeskapo nga hamokon sa mga nagdibal nga kalandrakas sa mga gipanghunahuna. Nga usahay, mosangpot sa kalibog dayon ngadto na nga kanunay gitiurokan sa kabalaka. Nga sagad mao kini ang hinungdan o sinugdanan sa depresyon o stress, nga permi na mawad-a'g kusog.

Aron malikayan nga dili kita maapektohan niini'ng mao'ng sitwasyon, angay makat-on kita sa maayo'ng pagduma, nga mapahimutang sa husto'ng paghan-ay ang gubot nga gipanghunahuna nato ni'ng kinabuhia. Kay kun di ni nato ayuhon sa pag-atiman, kalagmitan magbunga kini og dili maayo sa atong panglawas.

Kinahanglan gayud nga iprayoridad kini nga himuon dayon, nga kanunay nga okupado ang hunahuna sa mga gimbuhaton nga may kapuslanan sa karon. Pasagdi ang mga negatibo'ng hunahuna nga masulbad sa tukma'ng higayon. Isalindot ang mga butang nakahasol sa gilatid nga maayo mo'ng mga plano.

Himoa'ng tamdanan ang kakulangan sa kagahapon, nga mao'y buhaton ang karon.

Aron usab di ka na malibog alang sa imong ugma, nga kini'ng tanan mao usab ang pagpahimutang sa imo'ng maayong kaugmaon, nga dili na kinahanglan pa nga mabug-atan sa pagpahimutang sa mga positibo'ng panghunahuna.

Magkat-on ka sa pagpraktis nga lingkoran ang kaugalingon, nga mamalandong, aron molugdang ang kabug-at, nga matimbang mo ang angay nga buhaton nga makapasayon sa mga disisyon nga buot mo'ng han-ayon. Aron way mausik nga kahigayonan, bisan pa kadto'ng mga imposibli'ng buhaton.

Busa, mamalandong kita nga ipukos ang karon, nga maoy hunahunaon, pinaagi sa lawom nga pagginhawa, nga inanay ibuga ang mga negatibo'ng nakapasamok sa panghunahuna. Maglingkod nga di matarog, nga may 'timer' sa mamingaw nga dapit, aron di matugaw nga mokalma ang anaa sa hunahuna.