Daghang fire marshalls sa mga dakbayan ug kalungsoran sa Central Visayas, ingon man ang mga division ug section chiefs sa Bureau of Fire Protection (BFP)-7 regional office, gipatambong og Stress Management Seminar.
Ang kalihukan nga gitambongan mismo ni BFP-7 regional director Esmael Codilla didto gihimo sa Alta Garden Resort sa lungsod sa Cordova, Cebu.
Dili mabentahaan ang resource speaker sa among seminar, usa ka batid sa natad sa Psychology dinhi sa Sugbo nga mao si Dr. Anna Kathrina Oaminal-Watin.
Gipasabot ni Dr. Watin nga kinahanglang dili pulos trabaho ang atimanon sa matag bombero. Angayan pud diay nga magparelax-relax ug mogahin kini og panahon sa kaugalingon ug sa pamilya.
Daghang mga maayong punto ang gipaambit ni Dr. Watin nga makatabang gyud sa mga sakop sa BFP kun unsaon pag-atubang sa stress.
Sa maong paagi, mahimong efficient na unya ang performance sa atong mga kabomberohan kay makamao na man kini nga mo-handle sa mga stress.
* * *
Sa kataposan, pormal na nga gipasiga ang labing dako nga Christmas tree dinhi sa dakbayan sa Sugbo kaniadtong December 1, adlaw’ng Martes.
Naghatag kini og senyales nga nagkaduol na gayud ang Pasko. Ang inyong kabomberohan nang-apud-apod na usab og mga leaflets kabahin sa Fire Safety Tips alang sa hapsay nga pagsaulog sa Pasko ug Bag-ong Tuig.
Unta kanunay nga sadya ug malinawon ang Pasko.