Maka-substitute kaha si Duterte?

Matag eleksiyon, magbaha ang mga mehoras. Apan nganong mobaha lang kini panahon sa ting-eleksiyon?

Adunay senador nga kuli kaayong hikit-an kun walay eleksiyon. Apan karon ania sa Sugbo nagtuyok sa mga lungsod ug siyudad aron manghatag og financial assistance para sa mga ma-ospital. Ang dili masakiton, mag-ampo na lang nga masakit aron makatagamtam sa hinabang.

Nagduda ko nga mao usab kini ang hinungdan nganong si Mayor Mike Rama makig-away gyud sa konseho aron lang mabaligya ang mga luna sa South Road Properties ngadto sa mga negosyante, bahala na’g walay masterplan unsay tukoron sa paliton nga luna.

Ang halin sa mga luna sa SRP maggamit kaayo sa 2016 elections. Dili direkta nga ipamalit og boto, apan ang akong gikuyawan nga adto kini ipabaha sa mga barangay aron makakabig og daghang boto ang kampo ni Mike.

Sa uban, okay lang kini kay mabubo man ang kuwarta ngadto sa katawhan. Apan para nako, dili maayo kay pamolitika ra kini. Sa Supplemental Budget 1 nga gipakig-awayan ni Mike sa konseho tataw ang mga gastohan nga ipanghatag lang isip bonus sa mga empleyado, bayad sa mga utang sa pagkaon ug serbisyo ngadto sa mga alyado ni Mike ug tipping fee paghakot og basura nga ang mabulahan ang kandidata pagka-konsehal nga kapitan karon sa Inayawan.

Tay’m pa, nganong mangugat man si Mike niining SB-1? Ning panahona, ang tukion unta sa mga opisyal sa siyudad, ilabi na ni Mike, mao na man unta ang annual budget sa 2016. Nganong SB-1 man gyud? Si Bise Mayor Edgar Labella midangop sa Ombudsman aron pamandoan ang konseho nga moaksiyon na sa SB-1. Kini, matud pa, human modesisyon ang Regional Trial Court-Branch 9 nga legal ang pagbaligya sa mga luna sa SRP. Kun legal ang pagbaligya sa SRP, sumala sa korte, legal ba usab ang pagwaldas sa halin sa SRP? Anaa ba sa desisyon sa RTC nga mahimong iwaldas ni Mike Rama ang halin sa SRP?

* * *

Wala pa gani kaugpo, gipetisyonan na ang certificate of candidacy ni Mayor Rodrigo Duterte sa pagka-presidente.

Gikuwestiyon sa reklamante dili ang kandidatura ni Duterte kun dili kadtong matud pa “depektibo” nga COC ni Martin Diño sa PDP-Laban nga alang unta sa pagka-presidente apan iyang gisulatan og “for mayor in Pasay city.”

Ang petisyoner nagkanayon nga ang depekto sa COC ni Diño usa ka bugalbugal sa balaod, ug kay depektibo man, walay “substitution” nga mahitabo.

Mosugot ba kaha ang kampo ug mga supporters ni Duterte niini? Ang labaw sa PDP-Laban nga si kanhi senador Nene Pimentel miingon nga may tubag na sila niini. Unsa kahay ilang itubag niini?

Maka-substitute kaha si Duterte? Atangi!