Ayaw na idamay pa ang lungsod

Legal ang pagbaligya sa kagamhanan sa dakbayan sa Sugbo sa mga lote diha sa South Road Properties. Kini ang desisyon sa korte kabahin sa kaso nga gipasaka sa abogadong si Romulo Torres batok sa City Council.

Matud pa sa ruling ni Regional Trial Court Judge Alexander Acosta nga ang resolusyon sa Konseho nga nagtugot kang Mayor Michael Rama pagbaligya sa mga lote sa SRP wala makalapas sa ordinansa kabahin sa management niini.

Una nang mipasaka og kaso sa korte si Torres nga nagkwestiyon sa Konseho sa pagtugot niini kang Rama pagbaligya og mga lote diha sa SRP. Matud niya nga sukwahi kuno kini sa nalatid sa ordinansa.

Apan mitingog na ang korte. Nagpasabot kini nga makahimo na gayud ang kagamhanan sa dakbayan pagbaligya sa mga luna sa SRP base sa resolusyon sa Konseho. Ug dako kini nga kadaugan sa kampo ni Rama.

Kay midesisyon na ang hukmanan, sa ato pa legal diay ang transaksiyon tali sa dakbayan ug sa tulo ka investor diha sa SRP, kansang halin ang gigapos karon sa mayoriya sa Konseho nga kontra sa pulitika ni Rama.

Gumikan niini, wala nay rason ang Konseho ngano nga dili pa niini aprobahan ang Supplemental Budget 1 nga gikan sa halin sa pagbaligya sa mga lote diha sa SRP. Kini tungod kay dili na mahimo nga himuon nga rason niadtong mga sakop sa BOPK ang kaso nga gipasaka ni Torres aron nga padayon nilang kadenahan ang halin sa SRP.

Angay huna-hunaon niadtong nagyaka sa SB1 nga wala na silay baraha nga ikadiga pa human sa desisyon sa korte. Kay kun magmagahi gayud sila sa ilang baruganan, nan klaro nga aduna silay hidden agenda sa ilang lakang.

Ug kini nga hidden agenda mao ang pag-aberya sa mga programa sa administrasyong Rama. Gani, hangtud karon, wala na kunoy pundo ang dakbayan alang sa paghakot sa basura sa kabarangayan tungod kay dili pa ma-release ang maong salapi nga kabahin sa SB1. Sa padayong panaglalis kabahin sa SB1, ang nag-antos mao kitang mga yanong lungsoranon. Niining desisyon sa korte, hinaut nga bation og kaulaw kadtong nagpaluyo niining maong gubot. Ayaw na intawon ninyo idamay pa ang lungsod.