Walay klaro nga baroganan

Lisod gayud sabton ang anaa sa ulo niining mayor sa dakbayan sa Davao nga si Rodrigo Duterte. Tiaw mo nang human sa pipila ka bulan nga pagbalibad sa panawagan sa mga sektor alang sa pagdagan pagka-presidente sa sunod eleksiyon, nibali na usab karon ang iyang baruganan.

Basi sa iyang mga pamahayag sa media sa nakalabay nga mga adlaw, matud ni Duterte nga andam na ang tanan alang sa iyang kandidatura alang sa pagka-pangulo sa piniliay sa Mayo ilalum sa PDP-Laban. Iya nga ika-tandem si Senador Allan Peter Cayetano. Rason ni Durterte nga ang pagka-abswelto ni Senador Grace Poe sa Senate Electoral Tribunal maoy nakapaaghat kaniya pagdagan. Klaro kuno nga dula sa pulitika ang desisyon sa SET pabor kang Poe, kinsa giingon ni Duterte nga usa ka Amerikano.

Kahinumdoman nga giabsuwelto sa SET si Poe sa disqualification case nga gipasaka batok sa senadora tungod kuno sa kwestiyonable nga citizenship niini. Ug pwerte nga nakarebenta sa mayor sa Davao niini.

Samtang daghan ang nalipay sa iyang plano nga pagdagan pagka-presidente sa umaabot nga piniliay, daghan usab ang nangyam-id sa iyang desisyon. Kini tungod sa iyang pagka-walay klaro nga baroganan.

Sa nangaging mga bulan, hastang pangugat ni Duterte sa iyang desisyon sa dili gayud pagdagan alang sa labing taas nga posisyon sa gobiyerno bisan pa man sa makabungol nga pag-endorsar sa daghang organisasyon kaniya.

Wala gayud kuno siyay ambisyon nga mag-presidente. Halos matag adlaw kini niya nga gianunsiyo atubangan sa media. Gani matud niya nga moretiro na siya gikan sa pulitika human sa iyang termino sa pagka-mayor sa Davao.

Apan unsa bay iyang nakaon nga kalit lamang nga mibali ang iyang baroganan. Haskang dalia niyang nakaanunsiyo sa iyang kandidatura pagka-presidente human nga giabsuwelto sa iyang kaubanan sa Senado si Poe.

 Angay ba nga himuon nga presidente ang ingon niini nga walay klaro nga baroganan? Gusto man diay ni Duterte nga modagan, iya na lamang unta kini nga gianunsiyo sa nangaging mga bulan, sa wala pa ang pag-file sa certificate of candidacy. 

Kini aron ba pagpakita nga sinsero gayud siya sa iyang lakang pagdala sa renda sa pangagamhanan sa nasud. Apan sa nahitabo karon, morag nagpagoryo-goryo man hinuon si Duterte. Ug maayo kaha kini nga kalidad alang sa usa ka presidente?