EDITORYAL - Right of way sa pedestrians

Di pa lang dugay, nanawagan ang usa ka konsehal sa dakbayan sa Sugbu nga higpit ipatuman ang Traffic Ordinance sa dakbayan nga naglakip niining pagdakop sa mga sakyanan nga mobabag diha sa pedestrian lane o tabukanan sa mga tawo.

Apan bisan sa bag-ohay lang nga panawagan, daghan man gihapong mga motorista ang wala motahod niini bisan naa pay traffic enforcer sa City Traffic Office nga nagbarog diha sa ilang tungod.

Pipila ka mga eskina sa siyudad nga adunay pedestrian lanes ang halos di kaagian sa mga tawo kay nagbabag man ang mga sakyanan ilabi na ang mga pasaheroan ug mga motorsiklo diha sa ilang agianan.

Kun ang mga sakyanan adunay 'right of way,' ang Traffic Code adunay gihatag nga 'right of way' alang sa mga tawong molabang sa karsada. Kini bisan aduna o walay traffic signal diha sa usa ka eskina.

Base sa Article 17, Section sa Traffic Code sa siyudad sa Sugbo, ang tanang drayber kinahanglang momenor o kun gikinahanglan mohunong gyud sa pagdagan sa 'right of way' sa tawong molabang sa pedestrian lane o bisan  niadtong eskina nga wala niini.

Nganong ingon man niini ang mga drayber nga wala man gihapon mapitol? Dili ba kaha gihasolan na ang mga traffic enforcers sa pagdakop o bisan pagbadlong kanila?

Kun hasol o gikapoy sila sa paghimo sa ilang trabaho mas maayo pang mo-resign sila dili kutob lang sa pagsige og tagawtaw nga 'gahi man gud og ulo ang mga drayber.'  Dili unta sila magpanuko pagbuhat sa ilang trabaho kay disiplina man kaha sa karsada ang tumong ug tuyo niini.

Kun gahi og ulo nganong di man pitolon? Aduna man silay violation sa trapiko ug ang gobiyerno ug ang publiko andam kanunay pagsuporta kanila kun naghimo sila sa ilang trabaho. Kun kinahanglang panakpon sila aron motagam, buhata.