Wa gyud ko masayop sa akong basa sa laraw ni Davao City Mayor Rodrigo Duterte nga nagpadugang lang siya sa pusta ug kabahin sa iyang istilo sa pagpangampanya ang pagpadili-dili kunohay sa pagpapili pagka-presidente sa nasud. Bistado na nako ang maong istilo ni Duterte tungod kay kinaraan kini nga istilo sa usa ka trapo o traditional nga politiko. Gituyo sa mayor ug sa iyang mga handlers ang maong istilo aron ipakita sa mga wala masayod nga kunohay napugos siya sa pagpapili tungod sa singgit ug kagustohan sa katawhan. Chaar.
Pero mura’g magkaproblema si Duterte sa iyang substitution o pagpuli sa iyang kapartido nga mibakwi sa iyang certificate of candidacy tungod kay kinsa may iyang pulihan kun ang certificate of candidacy sa iyang kauban sa partido gibakwi niini.
Sigun sa Omnibus Election Code sa Pilipinas adunay tulo ka hinungdan nga puwede ang substitution sa kandidato ug mao kining mosunod; Kamatayon, pagbakwi sa kandidatura ug kapakyas sa pag-qualify. Sa unang hinungdan wala’y problema si Digong kay buhi pa man siya pero sa ikaduha ug ikatulo magkaproblema siya.
Ang akong professor sa Election Law nag-ingon nga ang buot ipasabot sa pagbakwi sa kandidatora isip hinungdan sa paghulip og kandidato mao ang pagbakwi sa kandidatora sa kandidato ug dili sa iyang sertipiko de kandidatora mao nga kay ang kandidato ra man ang mibakwi ug wala apila ang iyang sertipiko de kandidatora puwede siya nga mahulipan.
Sa kaso sa kapartido ni Digong ang iya gayong sertipiko de kandidatora ang iyang gibakwi ug di lamang ang iyang pagka kandidato mao nga mura’g magkaproblema niini si Digong. Tungod niining maong problema mosulod ni Mayor Duterte ang ikatulong hinungdan, ma-disqualified siya.
Hinuon aduna siya’y mga banggiitan nga abogado nga nag-alirong kaniya ug labing seguro gipangandaman na pud ni nila pagmaayo kay miingon na man gani ang mga Pimentel nga wala’y sami ang paghulip ni Digong sa iyang kapartido. Ato ning atangan.