Duterte nag-una sa survey

Sa diha nga medyo naklaro na nga molansar gyud si Mayor Rodrigo Duterte pagka-presidente, sa iyang tulomanon Arangkada, si Leo Lastimosa, mi-conduct og dinalian nga survey, nga kun ang eleksyon himuon karong adlawa (Monday, Nov. 23) kinsa ang botohan sa mga naminaw kaniya pagka-presidente.

Aron dili maka-organize og text brigade, sulod lamang sa 15 minutos ang gidugayon sa survey. Ug tuod man, sulod sa maong gidugayon, 85 ka text messages ang nadawat, meaning 5 to 6 messages ang nadawat matag usa ka minuto.

Ang resulta: Duterte, 44 votes, 51%; Roxas, 38 votes, 44%; Binay, 2 votes, 2%; Poe, 1, 1%. Sa ato pa, as far as region 7 is concerned, ang fight would be between Duterte and Roxas. Walay mibotar kang Sen. Miriam Santiago.

Hinumdom ko nga susamang survey ang gihimo months ago  sa tulo ka radio stations dinhi sa Cebu City, diin si Duterte gihapon ang nag-una, gisundan ni Roxas, wala manimaho sila si Binay ug Poe.  Kahinumdom sad ko nga sa pagkapilde ni FPJ dinhi sa Sugbo, miingon ang anak ni FPJ nga si Grace, nga kuno gitikasan ang iyang amahan dinhi sa Sugbo, nagpasabot nga mga tikasan kitang mga Sugbuanon.

Kining mga survey nga gihimo sa taga-Manila, pirmeng mag-una si Poe, hinungdan nga napugos na lang siya paglansar pagka-Presidente, kay alang niya, pinasikad sa survey, siya ang most qualified nga molingkod sa Malacañang, puli ni Presidente Noynoy Aquino.

Sa mga mibotar ni Duterte, ilang rason, mao nga magkinahanglan kita og isug ug decisive nga presidente. Ug sa kang Roxas, ilang rason mao nga, wala’y mansa ang pagkatawo ni Roxas, wala maduhig sa bisan unsa nga kahugawan ug siya ang angayan ug dunay katakos pagpadayon sa matuwid na daan ni Noynoy.

Dihay mi-text nga sa iya kunong pag-adto sa Manila, pirme siyang mag-taxi ug sulod sa pila ka adlaw didto sa Manila, ang tanang taxi driver nga iyang gikahinabi, pulos mobotar ni Duterte.

Lagmit ang maong mga taxi driver, wala malakip sa mga respondents sa mga survey nga gihimo sa taga-Manila.

Anyway, daghan pang mahitabo between now until election  day. Maghuwat lang ta sa final ug official nga announcement sa Comelec nga modagan gyud si  Duterte.

Duna koy mga amigo nga Duterte unta kuno sila, apan, kining iyang pag-atras-abante, pag-nukos-nukos, nakapa-discourage kanila.  Busa, Mayor, pag-sure diha uy! Tingali unya og mawad-an ka og mga dumadapig.

Anyway, maghuwat ta sa December 10.