Pasiatab sa politico

Haduol na ang piniliay nga gikatakda sa Mayo 2016. Ang katawhan mopakanaog na usab sa iyang balaanon nga katungod sa pagpili. Moingon ko nga balaanon kay mao man kini ang espiritu kon diwa sa usa ka demokrasya nga katilingban.

Apan inig-abot sa adlaw sa election ang balaanong katungod sa pagpili tabonan ra sa tinagingting sa salapi sa mga politikong oportunista. Apan baya, adunay mga tawo nga nagtamod sa balaanon niyang katungod sa pagpili kay way bisan diyutay’ng anino sa bahandi nga makaabot sa kantidad sa iyang pagpili.

Angay’ng magbantay ang mga botante niadtong mga politiko nga tigpasiatab sa ilang baba. Maayo lang sa saad apan inigkadaog na, dili na mahinumdom sa ilang gisaad. Wala pa gani maka-file sa ilang Certificate of Candidacy kadtong nagtinguha nga molansar, lanog na kaayo sa kahanginan ang pasiatab ingon man ang mga atake personal gikan sa mga tambulerong binayran.

Matud pa sa usa ka politiko, libreng pagpatambal sa mga district hospital sa lalawigan kay dili kuno negosyo kon dili serbisyo.

Ngano nga wa man ni niya buhata sa dihang naglingkod siya kaniadto pagka-board member? Nganong wa man ni niya isugyot sa iyang amahan nga naglingkod pagka-gobernador sulod sa siyam ka tuig? Ug sa iyang igsuon nga naglingkod usab sulod usab sa siyam ka tuig.

Karon na lang? Ang mga sakyanan libreng moagi sa taytayan ug mga karsada, kaha? Ang mga sakyanan dili makaagi sa taytayan ug karsada kun dili sila motubil og krudo ug gasolina.

Dili sila libre kay naghatag sila’g buhis pinaagi sa gasolina nga ilang gitubil. Tan-awa ang NLEX North Luzon Expressway ug ang SLEX South Luzon Expressway ug ang Aguinaldo Hi-way paingon sa Cavite, libre ba?

Dili. Ang tanang motorista nga moagi nihatag og bayad sa way hunong nga pagpangolekta sa agianan.

Kinsa ba ko nga mangahas pagsulti niini. Tipik lang ko sa gamay’ng kalibotan nga gipunsisokan sa mga kabus, apan katungod nako ang pagpadayag sa akong hunahuna.