Mao na kini karon ang nahitabo sa kontrobersyal nga Cebu International Convention Center (CICC) human kini gun-oba sa 7.2 Magnitude nga linog ug sa gamhanang bagyo nga Yolanda.
Sa pagtukod pa lang sa CICC naputos na kini daan sa kontrobersiya sa kurapsyon nunot sa giingon nga pagpaburot sa gasto nga ang pundo gikuha gikan sa bulsa sa mga magbubuhis.
Hinuon nagamit na kini kaniadto sa pipila ka dagko nga okasyon apan wala makabawi sa gasto dihang hinayhinay nga nagusbat ang mga dapat nga gigamit, ug gitiwasan sa sagunson nga pag-igo sa mga katalagman. Gihulagway ni Gobernador Hilario Davide III nga ang CICC nagsimbolo sa dako nga pag-usik-usik sa kuwarta sa iyang gisundan nga administrasyon ubos ni kanhi gobernador ug karon 3rd District Congresswoman Gwendolyn Garcia.
Adunay punto si Davide sa iyang mga argumento nga dili mogasto ang lalawigan sa pagpaayo sa CICC kay alang kaniya naduhigan o produkto kini sa kurapsyon.
Apan nasipyat ang gobernador sa paghimo og lakang aron masalbar ang dako nga gambalay nga gigastohan sa kuwarta sa katawhan.
Karon adunay grupo nga gitugotan sa Kapitolyo nga mobutang og higante nga political advertisement nga gitaod mismo sa atubangan sa CICC nga nagkanayon "NEVER AGAIN" ug gipun-an pa sa kantidad nga nausik sa pagtukod niini!
Ang “Never Again tarpaulin” gisakyan usab sa kontra ni Davide nga si Winston Garcia tungod sa pagbaliwala sa gobernador sa CICC kay hingpit na gyud hinuon nga nausik ang salapi nga gikan sa mga buhis.
Gumikan sa init nga politika, ang katawhan maoy nalugi ug ang nabulahan karon gawas niadtong mga buaya kaniadto nga nakaganansya, ang mga uk-uk (ipis) ug ilaga nga maoy literal nga naghari karon sa Cebu International Convention Center.
Pagkausik gyud!