Political propaganda

Klaro na gayud nga gipamulitika na ang kontrobersiya sa katukoran sa Cebu International Convention Center. Ug kay nagkainit na kini, mao unya kini ang nag-unang isyu nga sumsoman atol sa kampanya alang sa piniliay sa sunod tuig.

Miukay karon ang “never again” banner nga nagbandera diha sa CICC. Nahisulat niini ang gatusan ka milyon nga salapi sa lungsod nga nasayang paggasto sa katukoran sa maong convention center.

Usa kuno ka grupo ang nagpaluyo niini. Ug kun unsa ang motibo sa Cebuanos for Good Governance and Development klaro nga gitumong kini ngadto sa kaatbang sa kasamtangang administrasyon sa probinsya.

Bisan pa man kun wala siyay kalibotan niini, matud pa sa usa ka pamantalaan nga adunay “approval” gikan ni Gobernador Hilario Davide III ang pagplastar sa grupo sa mao nga banner diha sa CICC.

Apan maayo kaha nga gamiton ang CICC pagbira sa kaatbang ni Davide? Dili ba kaha kini below the belt nga pag-atake bisan pa man nga mismo ang kaatbang ni Davide sa sunod eleksiyon dili man ang kanhi gobernador nga maoy nagtukod sa maong kontrobersiyal nga edepisyo?

Sa akong tan-aw, dili kini maayo. Klaro nga gipunterya niini ang pamilyang Garcia. Sa akong pagsabot niini, gusto ipasabot sa maong grupo nga “never again” na gayud nga tugotan ang pamilyang Garcia nga makabalik pa sa Kapitolyo.

Bisan pa si Cris Saavedra, ang whistleblower sa giingong anomaliya sa katukoran sa CICC, ang wala makaayon sa paggamit sa maong grupo sa maong building. Matud ni Saavedra nga usa kuno kini ka political propaganda. Ug nakahunahuna siya nga mopasaka og kaso batok niadtong nagpaluyo niini.  

Hinuon katungod sa maong grupo nga mangampanya kun si kinsa ang dapigan niini sa sunod nga piniliay. Apan dili usab maayo nga ilang gamiton ang maong convention center pagsustiner sa ilang kawsa.

Klaro nga political propaganda ang gihimo sa mao nga grupo. Ug kun ako pay Gobernador Davide, akong ipatangtang kining mao nga banner. Kini tungod kay basin kun mosumbalik na unya hinuon kini sa iyang kandidatura.