Unsaon pag-transfer sa yuta nga sinunod

Dear Atty. Divine,

May ipangutana unta ko parte sa yuta nga bahin nako sa akong parents. Gusto unta ko nga ma-transfer na kini sa akong name. Unsa man ang akong buhaton ug pila kaha ang akong magasto sa pagpa-transfer? Thanks and more power! — Reynan

Dear Reynan,

Kun ang property nakapangan pa sa inyong parents, kamong mga igsuon angayan nga mo-execute og Extrajudicial Partition nga pirmahan sa tanang mga heirs ug panotaryohan. Inyo sab nga ipa-survey ang property aron patas ug husto ang sukod sa pagbahin ug ma-identify kun asa ang inyong share sa maong yuta. Human niini, inyong i-submit sa BIR nga adunay hurisdiksyon sa maong property aron ipa-compute ug bayran ang Estate Tax sa maong property. Adunay mga dokumento nga pangayuon ang BIR inigpa-compute sa estate tax sama sa death certificate ug uban pa, busa mas maayo nga mangayo ka nila sa listahan sa requirements.

Ang survey kinahanglan sab nga inyong pa-aprobahan sa Bureau of Lands. Kun mogawas na ang Certificate Authorizing Registration sa BIR then adto kini nimo i-submit sa Assessor’s Office sa lugar diin mahimutang ang property alang sa imong pagbayad sa transfer fee ug sa pagpa-issue og separate nga Tax Declaration. Human niini adto ka sa Register of Deeds alang sa pagpa-issue og Title ug ilakip nimo sa pag-submit ang original title ug ang approved plan sa survey gikan sa Bureau of Lands ug mobayad ka nila og registration fee and other fees. Di ko makasulti kun pilay magasto kay magdepende na sa ilang computation ug sa zonal value sa imong property. - Atty. Divine

 Alang sa inyong pangutana may kalabutan sa problemang legal, ipadala lang sa Legal Corner sa Banat News sa V. Gullas St., Cebu City or email sa [email protected] ug tubagon nako ang inyong pangutana pinaagi sa akong column matag Miyerkules ug Domingo.