Gahong ni Duterte

Hangtod karon may mga dumadapig si Davao City Mayor Rodrigo Duterte nga nisangon sa ilang kaugalingon sa talagsaong tahas sa pag-text ug pagpanawag sa mga programa sa radyo ug pagpabaha og mga komentaryo sa hapit tanang posts sa Facebook ug Twitter pagpadayag sa mosunod nga mga linya:

Si Duterte ang labing takos sa tanang magpapili pagka presidente;

Si Duterte ang makasulbad sa nagbuntaog nga mga problema sa ilegal nga drugas ug kriminalidad;

Si Duterte ray makabungkag sa pagdominar sa Manila sa nasudnong gobyerno pinaagi sa federalismo; ug

Si Duterte modeklarar sa iyang kandidatura puli sa nisibog nang kandidato sa PDP-Laban o sa hapit na mosibog nga si Senador Miriam Defensor Santiago.

* * *

Akong pagduda sukad pa sa sinugdanan sa mga pasumbingay ni Duterte sa iyang politikanhong mga ambisyon mao nga ang sibaw nga mga awhag pagpadagan niya mahilom kun modeklarar na sa iyang kandidatura. Ug mahimo siyang kasarangan nga kandidato. Nga tungod sa kakuwang og kuwarta ug makinarya way kahigayonan sa pagdaog.

Nagduda sab kong nahibawo si Duterte ini, salamat sa lapad niyang kasinatian sa kamausab-usabon sa hangin sa politika ug sa pait nga gidangatan sa mga nagpada sa ulog-ulog. Maong wa pa siya modeklarar. Maong nagpadayon ang pag-atang sa sunod niyang sulti ug lakang. Maong kumbinsido kong di gyud siya modagan pagka presidente.

* * *

Una nakong nahinabi si Duterte sa posible niyang pagdagan pagka presidente sa lobby sa Waterfront Cebu City Hotel. Taliwa sa mga barangay kapitan sa Davao City nga nipadayag sa ilang kaandam pagpapusil (kay nipasidaan si Duterte nga iyang pusilon ang mga dumadapig nga mangampanya alang niya), nideklarar si Duterte: “Di lagi ko modagan!”

Sa wa pa kong kasugod sa sunod nga pangutana, nipaapas siya: “Pero kining mga amaw nga naglibot nato (uban ang pagtulisok sa nahilaw nga mga kapitan), nga nag-usik-usik og kuwarta pagpasamot og dato sa Sugbo, kini silang tanan mosulti nimo nga (ug nipahiyom siya) bakakon ko!”

* * *

Gihulagway sa mga tigpaniid ang salida ni Duterte nga “reverse psychology.” Nangagpas sila nga nagtuo si Duterte nga ang padayong pagbalibad makapasamot sa kadasig sa iyang mga dumadapig, nga mahimong makapatagak sa iyang gihandom nga “grasya sa langit,” ang puntil nga igo gyung makapalahutay og nasudnong kampanya.

Nahadlok hinuon kong di na kahaw-as si Duterte ning gahong nga gipahimutangan sa iyang kaugalingon. Labaw sa pagpanluod sa iyang mga dumadapig (nga inanay nang nakabatyag nga igo lang silang gipasakay) ug labaw sa mga pasiaw nga mokanaog siya sa kasaysayan isip labing maayong presidente nga wa modagan, mao ang dakong kahigayonan nga makumbinser ang mga dumadapig, apil nang mga molupyo sa Davao nga naghangad niya sa niaging mga dekada, nga bakakon gyod diay. Ug di kasaligan. [email protected]