Usa ni ka negatibong kinaiya, nga naghatag og di maayong sangputanan sa ato'ng pagkatawo. Nga imbis makaaayo sa motibo o sa katuyoan, nasukwahe hinuon sa gituhoan tang epekto, nga mao diay ang kadaut sa atong imahe.
Apan sa laing bahin, makahatag sab kini'g kaayohan sa kaugalingon nato, kun maantigo ka'ng mobalanse sa pagdala ini'ng pagpakaaron-ingnon. Kana'ng sa pakigharong sa tawo buot kang dili ka mamatikdan nga ingon sama ka matinud-anon sa imong mga pasalig . Aron paglig-on sa kompiyansa niya diha nimo.
Kun eksperto ka ini sa pagdiskarte, maisip kang swerte nga nagbaton ka niini, kay sagad elemento kini'ng makahangop ka'g dagha'ng tawo.
Nga di mobalibad sa pagkuyog sa mga nindot nga ihanyag mong oportunidad, nga makatabang sa pagpalambo sa ilang kinabuhi. Gumikan sa maayong diskarte sa pagpakaaron-ingnon. Matngoni lang di ka makalapas sa imong kamatinud-anon.
Kay gamay nga sipyat lang ini, mahimong makaguba sa ligdong mong pagkatawo, nga wala na'y motuo o mosalig kanimo, bisa'g unsa ka kamaayo nila, yam-iran ka's hilom, nga nadaut pang nilubad ang pakighigala nila kanimo. Ang masud-ong kaaslom sa ilang pahiyum, nagpasabot nga wa ka na'y paglaum.
Ang pagpakaaron-ingnon, dili usa ka pagtakuban alang sa dauta'ng katuyuan, kun dili pagdani lamang nga kahatagan ka'g higayon makapadayag sa imong katuyoan. Apan ang imo tuyo, iseguro nga makaayo usab kini kanila. Diha ka na magmatinud-anon sa tinguha'ng pulos kamo nga makabenepisyo.
Ayaw pagsulay sama sa uba'ng gihimo, mao la'y gitinguha ang pagbitik alang sa iyang kaugalingong interes.
Hangtud naguba ang kredibilidad sa pakigrelasyon sa isigkatawo, nga mao'y tinubdan sa ato'ng pagpakabuhi.