Pag-ampo sa mga kalag

Samtang gidagsa sa liboan ka tawo ang mga menteryo sa Adlaw sa mga Santos gahapon, karong adlawa posible nga magmingaw na ang ubang mga sam-ang, o dili na ingon kadaghan ang moduaw sa mga lubnganan, kay balik trabaho na. Dili holiday karong adlawa.

Gahapon bisan sa kainit sa panahon, nagkatapok ang mga buhi diha sa mga menteryo aron duawon ang lubnganan sa mga kabanay ug mga higala nga niuna sa pagbiya sa kalibutan sa mga buhi.

Gawas sa bawon nga payong ug tubig o bisan unsa nga mainom panagang sa kainit, bitbit usab sa mga ginikanan o sa mga anak nga gimingaw sa ilang mga mahal sa kinabuhi nga nitaliwan na, ang mga paborito nga pagkaon o ba kaha ilimnon sa ilang mga minatay, samtang sila buhi pa.

Diha sa ilang mga lubnganan buhion pagbalik ang ilang mga malipayon nga kasinatian kaniadto. Kini nahimo na nga kabahin sa atong kultura ug tradisyon. Apan gawas sa pagmaya, sa makausa pa gipahinumduman kita nga mga katoliko, sa ka importante ilabi na karong adlawa nga gitagana alang sa mga kalag.

Nga samtang atong gihandom ang malipayon nga mga adlaw nga ato sila nga gikauban kaniadto, kinahanglan nga ato sila nga gahinan og mga pag-ampo ingon man sa mga kalag nga posibleng wala na’y naghandom kanila.

Ang Nobiyembre Dos, gigahin sa simbahang katoliko sa paghandom alang sa adlaw sa mga kalag nga anaa pa sa purgatoryo aron kita nga mga buhi mag-ampo alang nila, samtang padayon sila nga gihinloan sa mga gagmay’ng sala pag-andam kanila aron mahimong takus nga makasaka sa langit.

Busa giawhag kita sa simbahan nga motambong gihapon sa mga misa alang sa mga kalag. Bisan kun balik trabaho na ug ma-busy na ang uban sa daghang gimbuhaton, ato gihapong gahinan og oras ang Adlaw sa mga Kalag aron ato sila nga i-ampo.

Sa atong pag-ampo usa ka plenary indulgence ang atong personal nga mapahimuslan ug mapaambit ngadto sa mga kalag. Pinaagi sa plenary indulgence malikay kita sa temporal punishment sa atong mga sala ug sa maong pamaagi makatabang kita sa pagpahaw-as sa usa ka kalag gikan sa purgatoryo.

Unsaon man kini sa paghimo? Base sa https://www.ewtn.com/expert/answers/indulgences_conditions.htm mosulod kita sa simbahan, mag-ampo og usa ka Amahan Namo ug usa ka Apostles Creed.

Dayon mokalawat ug mag-ampo og usa pa ka Amahan Namo ug Maghimaya ka Maria alang sa mga intensyon sa Santo Papa.  Ang katapusang rekisito mao ang pagpangumpisal.

Makahimo ka sa pagkompisal pito ka adlaw sa dili pa o humana sa mga intensyon nga imong gipangayo.

Sa maong pamaagi, kun ato kining mahimo, atong mapabatyag ngadto sa atong mga paryente, ginikanan, mga igsoon o sa  atong mga higala nga nangamatay na ang atong pagmahal kanila.