Dili maayong pugson si Duterte

Ang walay hunong nga pag-awhag sa katawhan nga si Davao City Mayor Rodrigo Duterte padaganon gayud pagka presidente sa nasud maisip nga usa ka pag-insulto kaniya.

Sinati nako ang pagkatawo ni Rody sukad kaniadtong 1992. Dili siya talawan, hinuon si Rody usa ka utokan ug matinud-anon. Nasayod si Rody nga sa nasudnong politika usahay dili kalikayan nga makig-compromise sa usa ka isyu.

Nasayod ko nga si Rody dili makig-compromise. Dili siya ingon niana. Ang mga tawo nga mahimong presidente dili usab kalikayan nga makaangkon og kasuko sa mga tawo sa dili pa mapupos ang ilang termino. Kinsa kaha ang ganahan nga motapos sa iyang panerbisyo nga ingon niana?

Gani sa pagka karon, may mga tawo na nga nasuko kang Rody kay gibalibaran niya ang awhag paglansar pagka presidente. Naay mga dili ilado nga kandidato nga bulgar kaayo sa ilang ambisyon apan maoy pugson ang walay gusto sa katungdanan. Ngano man gyud? Nakasabot ko nga daghan ang nasagmuyo, ang uban tingali nasakitan, tungod kay dili molansar si Mayor Duterte sa pagka presidente. Apan sa dili pa kamo magpalabi sa inyong pagbati, tuguti ko nga mopaambit kaninyo sa akong prinsipyo ug kasinatian isip manager.

Kun mopili ka og tawo alang sa usa ka tahas, kinahanglan nga ania kining mosunod: 1.)  Kinahanglan nga takus siya nga makatuman sa tahas nga isangon kaniya, ug 2.)  Ang mao nga tawo andam nga mohimo sa atong isangon kaniya nga trabaho.

Gibalikbalik na ni Rody nga wala siya mangandoy nga mahimong presidente sa nasud, ug dili makahatag og kaayohan kanato nga pugson nato siya sa katungdanan.

Gihatag na ni Rody ang sinsero nga pangalagad sa katawhan sa Davao ug ang mga Dabaweños nangandoy pa nga ipadayon ni Rody ang iyang pagserbisyo kanila.

Bisan og dili modagan pagka presidente si Rody apan susama ra nga nakaserbisyo na siya sa katawhan sa nasud pinaagi sa pagpakita kanato kun unsa ang matuod nga lider.

Suwerte kaayo kamo’ng mga Dabaweños nga nakaangkon og mayor nga sama kang Rody. Sa ubang katawhan sa nasud, magtinabangay kita pagpili og atong mga lider nga susama og “standards” kang Mayor Duterte ug ato siya nga hatagan og kalinaw. Alang sa higala ko nga si Rody Duterte, dawata ang akong panghinaot alang sa malampuson mo nga pagpasubli sa katungdanan.