Kabilin sa nangagi’ng mga presidente

Ang labing dako’ng hagit nga angay pangandaman sa katawhang Pilipinhon karong human na ang filing sa mga Certificates of Candidacy (COC), ilabi na sa magpapili pagka-presidente sa nasud, mao ang paghashas ug pag-ila kinsa kanila ang dunay igo nga katakos ug liderato sa pagpangulo sa nasud.

Matud sa Comelec, ang presidential election sa 2016 maoy labing daghan og nisang-at og COC. Niabot sa 130 ka tawo ang gusto nga magpapili sa pagka-presidente.

Hinoon kining 130 nga nisang-at sa ilang mga COC, posible nga mohiyos sa lima ngadto sa unom nga kwalipikado nga kandidato.

Sukad 1986 hangtud 2010 nga mga presidential elections, may average nga lima ngadto sa napulo ang mga kandidato pagka-presidente.

Sa 1986 snap election, may upat ka kandidato. Sila si anhing presidente Ferdinand Marcos, Cory Aquino, Reuben Canoy ug Narciso Padilla. Nidaog si anhing presidente Aquino ug iyang napabanhaw ang demokrasya.

Sa 1992 presidential election unom ang gipilian. Sila si Fidel V. Ramos, Ramon Mitra, Jr., Miriam Defensor-Santiago, Eduardo Cojuangco, Jr., Imelda Marcos, Jovito Salonga ug Salvador "Doy" Laurel.

Si kanhi presidente Ramos ang nidaog sa gamay kaayo nga labaw batok ni senador Miriam Defensor-Santiago, nga hangtud karon wala pa makadawat ug dili pa makapasaylo ni Ramos nga iyang gipasanginlang nilunggob sa iyang kadaugan. Si Ramos ang nihatag og dungog sa Pilipinas nga "Tiger Cub Economy in Asia.”

May napulo ka kandidato usab ang gipilian pagka-presidente niadtong 1998. Sila si Joseph Estrada, Jose de Venecia, Raul Roco, Lito Osmeña, Alfredo Lim, Renato de Villa, Miriam Defensor-Santiago, Juan Ponce Enrile, Santiago Dumlao ug Manuel Morato. Si kanhi presidente ug karon Manila City mayor Joseph Estrada ang nidaog. Apan napalagpot sa pwesto ug napriso sa kaso nga plunder. Niadtong 2004 lima ang gipilian. Sila si Gloria Macapagal Arroyo, Fernando Poe, Jr., Panfilo Lacson, Raul Roco ug Eddie Villanueva.  Si kanhi presidente ug karon Kongresista Gloria Arroyo ang nidaog. Apan sama sa iyang gipulihan nga presidente, napriso si Arroyo sa kaso sa pangurakot.

Sa 2010 presidential election, 10 ang nikwalipikar sa pagka-presidente.  Sila si Benigno Aquino III, Joseph Estrada, Manny Villar, Gilberto Teodoro, Eddie Villanueva, Richard Gordon, Nicanor Perlas, Jamby Madrigal, Juan Carlos delos Reyes ug Vetaliano Acosta. Si PNoy ang nidaog.

Iyang giduso ang "daang matuwid" ug nipapriso nilang kanhi presidente Arroyo, senador Jinggoy Estrada, Ramon "Bong" Revilla ug Juan Ponce Enrile tungod sa PDAF scam ug nipalagpot ni SC chief justice Renato Corona. Dili pa man hingpit manamilit  sa katungdanan, apan magbilin na si PNoy og tatak sa daghan usab nga bulilyaso, sama sa Manila hostage crisis niadtong 2010 nga nipatay sa walo ka Hong Kong nationals ug sa hostage taker ug sa kamatayon sa 44 ka sakop sa PNP Special Action Force.