Kataposang 13 ka adlaw
Gikabalak-an nga magpunsisok nang mga botante nga magparehistro ug magpa-biometrics ning kataposang duha ka semana sa di pa tak-opan karong Oktubre 31 ang pagpanlista sa mga botante nga makaapil sa piniliay sa Mayo 9, 2016. Bisan sa kataas sa lugway nga gitakda sa Commission on Elections (COMELEC) may mga botante gihapon nga nipili sa kataposang mga adlaw sa pagparehistro sa labing unang higayon, o pagbalhin og presinto, o pag-update sa ilang biometrics.
Di ron panahon pagtulisok sa mga langayan. Mahimong lehitimong mga hinungdan sa kapakyas pagpalista o pagpa-biometrics dayon. Angayng magtinabangay ang COMELEC ug tanang hingtungdan pagsegurong mas daghang makaapas ug kun mahimo makabotar ang tanang gustong mosalmot sa piniliay unom ka buwan gikan karon.
* * *
Makatabang ang kauyonan tali sa COMELEC ug sa pribadong shopping malls pagtanyag og mas hamugaway nga off-site registration venues. Bisan ang mga buhatan sa COMELEC sa mga dapit nga way malls nibalhin sa rehistrasyon sa mas dagkong luna sama sa gym, plaza ug mga buhatan sa munisipyo ug kabaranggayan.
Nakaplagan hinuon sa COMELEC nga may mga negosyante nga igo lang nikabayo sa kabaga sa mga botante nga modugok. Nitanyag og mga luna sa ilang malls nga mas apiki pa kay sa mga buhatan sa COMELEC. Mao nga inay mahimong mas sayon mas nahasol na hinuon ang mga botante, gawas nga nangasaag, sa alternatibong mga luna.
* * *
Bisan ang pagtanyag sa COMELEC og registration forms online wa hingpit nga makatabang. Ang ma-download mao ra diay ang porma alang sa bag-ong mga botante. Kay wa may klarong tugon, nasayop og download ang mga botante nga mamalhin og mga presinto ug mas nalangay pa hinuon kay kinahanglan na man sang mosuwat sa husto nang porma.
Nakatabang ang pagbutang sa COMELEC online sa listahan sa mga botante nga (1) naa pa sa opisyal nga listahan, (2) numero ug nahimutangan sa ilang presinto ug (3) ang mga rehistrado apan wa pay biometrics. Apan wa kapahimusli sa mas daghang botante nga way internet access.
* * *
Makatabang sab ang paglugway sa COMELEC sa ilang trabaho gikan sa walo ngadto sa 12 ka oras matag adlaw, gikan sa alas-8 sa buntag hangtod na sa alas-8 sa gabii. Labi na sa mga trabahante ug mga tinun-an nga makahigayon lang human sa alas-5 sa hapon.
May limitasyon hinuong COMELEC nga lisud tapakan: Kuwang ang ilang data capturing machines ug bisan sa pasalig sa nasudnong mga opisyal lisod nang kapun-an ang ilang computers sa mosunod nga 13 ka adlaw; ug busa kabalibaran g’yud ang mga botante nga subra na sa ilang inadlaw’ng kapasidad. Mahimong di gyud tanang kwalipikadong botante ang makabotar. Konsuylo hinuon nga gihimo sa COMELEC ug mga botante ang tanan. O hapit tanan.
* * *
- Latest
