Ambot ngano nga all of a sudden, nahimo man nga attractive kaayo ang pagpang-alagad sa lungsod. All of a sudden, ang mga buot magpapili, nahigugma kaayo sa katawhan, labi na sa mga kabus, kay lagi, mga pro-poor sila.
Ang nagtukmod kuno kanila paglansar mao ang ilang tinguha nga makahatag og tukma nga pag-alagad sa lungsod. All of a sudden, naluoy ug nabalaka sila sa kahimtang sa mga kabus.
Nagdugo kuno ang ilang mga kasingkasing nga nagtan-aw sa pinasagdan ug sinalikway nga katawhan.
Apan, pag-alagad ba g’yud kaha ang nakaagni ug nakadani kanila sa ilang pagpunsisok sa mga buhatan sa Comelec aron pag-file sa ilang Certificates of Candidacy (COC)? Sila ra’y makatubag niini.
Of course, ato silang pahalipayan sa ilang kaikag pag-alagad sa lungsod. Wala’y makapugong kanila ug ania na kanatong mga pumipili ang paghukom kun kinsa kanila ang angayan tugyanan sa atong pagsalig.
Mao man gani nga atong gibalikbalik dinhi ang atong mga pahimangno sa pag-amping sa balaan natong katungod pagpili, nga dili kini nato yama-yamaan, aron nga, once and for all, makabaton na gayud kita og tiunay nga mga alagad sa lungsod.
Yes, alegre kaayo ang umaabot nga eleksyon. Daghan ang mga pilionon, nag-inilogay kinsa makahupot sa mga dagko’ng elective positions sa kagamhanan.
Apan, atong namatikdan nga managsama ra ang ilang mga plataporma, managsama ang ilang mga laraw ug mga plano, managsama ang ilang katuyoan sa pagpang-alagad, managsama ang ilang gugma ug concern ngadto sa mga kabus.
Ambot kun ngano nga dili sila magkasabot ug maghiusa na lang, ug dili mag-unay pagpanghimaraot sa isig-usa kanila?
Ang nakadaot kay silang tanan gusto nga mag-presidente, mag-bise presidente, mag-senador, magbabalaod, gobernador, mayor ug uban pa. Taas-taas lang na sa balota.
Sa circus pag-file sa mga COC, dunay namahayag nga ang tingog sa Ginoo mismo ang miawhag kanila paglansar; divine intervention kuno.
Unya sila si Fred Lim ug Erap, naghinagitay. Gusto ni Lim nga maglumba sila og jogging. Apan, si Erap nga magsusapinday na og lakaw, mag-boksing na lang kuno sila.
Yes, baby, alegre ang umaabot nga eleksyon. Apan, atong ipahinumdom pag-usab dinhi nga this election can make or break our country.
Busa, vote wisely ug responsibly. Suway og paminaw sa imong konsiyensiya. Sutaa ang mga isyu. Ayaw padala sa mga komentaryo sa media ug sa mga politiko mismo o sa resulta sa mga survey.
Suhitoa ang mga isyu ug timbang-timbanga kun hain ang matuod ug hain ang bakak.