EDITORYAL - Paigot nga kandidato

Adunay tagsatagsa ka diskarte ang mga politiko sa pagduso sa ilang kandidatora, adunay uban simple lang, adunay banha kaayo ug daghang kasikas ug aduna say hilom ra kaayo nga niduso sa ilang kandidatora. Apan aniay usa ka politiko nga gipaabot ang tanan kun modagan ba siya o dili sa pagka-presidente. Siya namahayag nga di siya interesado sa pagka-presidente apan lahi man ang senyales nga gipakita sa iyang mga sinaligan.

Gani adunay niduso sa iyang COC pagka-mayor sa siyudad niadtong Huwebes , apan sa samang adlaw adunay nag-viral nga mga hulagway sa social media bahin sa pagpaopaw sa iyang mga supporters aron agnihon siya sa pagkandidato.

Nianang pagkagabii sa adlaw nga Huwebes nipatawag siya og press conference ug didto iyang gipahibalo nga mag-mayor lang gyud gihapon siya ug di siya mokandidato pagka-presidente.

Apan sa gihapon, lahi man ang mga gipakitang kalihokan sa iyang mga supporters maong wala gihapon mapapas ang mga pagduda nga paukyab lang kini.   Sa naghinapos nga mga oras sa deadline sa filing sa COCs kagahapon ,  adunay niggawas nga tweet sa GMA News kabahin sa pagduso og COC pagka-presidente ni Martin Dino.

Siya giingong secretary general sa Partido ng Demokratikong Pilipino-Laban (PDP-Laban) usa ka dako ug lehitimong political party sa nasud.

Kun analisahon, nganong mopadagan man og kandidato ang usa ka dakong political party nga wala mailhi ug wa gani maapil bisan makausa sa mga presidential preference rating surveys?

Angay hinumdoman nga karon pang Disyembre 10 ang kataposang adlaw aron mag-withdraw ug mag-ilis og kandidato. Di ba kaha kini siya maoy 'decoy' sa mayor?

Kung gusto gyud moserbisyo sa katawhan, nganong ipaagi man sa lipat-lipat? Wa ba kaha ni siya na-pressure lang?

Apan kun kini maoy ilang taktika aron hasulon iyang makaatbang , posibleng nakadulot kini sa mga kontra, apan unya lang ni mahibaw-an ini na og eleksyon.