Palabwanay sa kalaki

Nahugyaw na ang tanan sa dihang daghan ang nagpanon ngadto sa Commission on Elections aron pag-file sa ilang kandidatura. Morag nagpiyesta ang mga buhatan sa Comelec sa tibuok nasud gumikan sa nagpunsisok nga mga kandidato.

Didto sa kaulohan, early birds kadtong mga kandidato pagka-presidente nga kuyaw og mga plata porma. Adunay mi-file sa ilang kandidatura tungod kay gisugo kuno sila sa Ginoo ug adunay mi-file usab aron pagpabalik sa Pilipinas ilalum sa pako sa Estados Unidos.

Gani, adunay misyonaryo nga miduso sa iyang kandidatura pagka-presidente kaniadtong Martes tungod sa mando sa iyang ‘master.’ Matud ni Romeo John Ygona nga gusto siyang “Lucifer” ang isulat sa balota sa mga mobotar kaniya.

Siguro nakaila na kamo ni Atty. Ely Pamatong. Siya kadtong sige’g duso sa iyang kandidatura matag piniliay. Kun siya kuno ang mapili nga presidente, iya kuno nga ibalik ang Pilipinas ngadto sa sabakan sa Amerika.

Apan wala mosaler kini iyang ideya kay sige nga taktakon sa Comelec ang iyang ngalan gikan sa opisyal nga listahan sa mga kandidato. Dihay usa ka higayon nga pwerteng sukoa ni Pamatong kay lagi gihimo siyang nuisance candidate sa Comelec. Sa iyang kalagot, daghan sa mga sakyanan sa kaulohan ang gikatahong gisuyakan sa iyang grupo.       

Hinuon kining maong klase sa mga kandidato salaon pa sa Comelec kun aduna ba silay kapasidad nga makalusad og halapad nga kampanya sa tibuok nasud. Ug kun wala, nan siguradong masilhig ang ilang ngalan ngadto sa basurahan sa mga nuisance candidates.

Sa laing bahin, katungod ni bisan kinsa nga modagan alang sa unsa mang pampubliko nga posisyon. Ilalum sa atong Konstitusyon, kadtong mahibalo nga mobasa ug mosulat puwede na nga makadagan basta makab-ot nila ang mga requirements.

Mao nang inig abli na gani sa mga buhatan sa Comelec alang sa unang adlaw sa filing sa certificate of candidacy, mag-una kanunay kadtong mga nuisance candidates kinsa dali dayong mopaukyab sa ilang misyon.   

Apan inisyal pa kining maong panghitabo sa pulitika karon. Ang tinuod nga sirkus mahitabo unya panahon sa halapad nga kampanya diin mag-iyahay na og palabwanay ang mga kandidato sa ilang kalaki aron pagdani og mga boto.