Daghan ang nag-ingon nga nahimong 'karnabal' ang filing of candidacy diha sa Comelec gikan pa niadtong adlaw nga Lunes ug posible hangtud karong adlawa.
Pwerteng daghana ang nisang-at og kandidatura nga "lagpas" kaayo og mga plataporma, ang uban sa angga pa lang sa ilang mga pangalan di kalikayang madudahan kun tarong pa sila og pangisip.
Apan sa gihapon gidawat sila sa Comelec kay lagi demokratikong nasud man ang Pilipinas ug dunay proseso sa paghinayhinay pagtangtang kanila sa lumbang lugaynon.
Kataw-anan man tuod silang tan-awon apan kun tigumon ang mga pinakamaayo nilang gipanulti sa ilang 'plataporma de gobiyerno' adunay mapunit nga pagtulon-an sa ilang gipang-estorya.
Silang mga gihukman na sa mga tawo isip "nuisance candidates" usahay mas aduna pay sinsiridad sa ilang gipanulti itandi sa mga tradisyonal nga mga politiko.
Apan sa panahon karon, kuwangon ra ang sinsiridad aron modaog ang usa ka kandidato. Kinahanglang adunay klarong partido, may kwarta nga magamit sa kampanya, dunay klarong plataporma, ug duna gyuy tsansang modaog.
Kining paglansad sa mga yanong tawo nagpakita lang nga bisan sila nakabatyag diay sa problema sa nasud karon.
Bisan sila nga walay kabangkaagan sa panggobiyerno naagni paglihok aron tabangan ang nasud kay sila nagpakabana samtang ang uban nanaway lang kanila.
Busa karong eleksyon sa 2016 di unta usikan sa mga 'tarong' og utok ang ilang usa ka boto ug botoran kadtong tarong nga kandidato aron sa sunod nga eleksyon, di na kita makakita niining mga "nuisance candidates" nga magkarnabal diha sa Comelec.