Ang pagka-presidente

Unsa ba ang anaa sa posisyon sa pagka presidente sa nasud nga daghan man kaayo ang mag-apas sa maong posisyon?

Sa labing uwahi nga ihap sa mga nakasang-at na sa ilang Certificates of Candidacy hangtud kagahapon sa udto, 45 na ang gusto nga magpresidente.

Sa 45 nga nakasang-at na, si Bise Presidente Jejomar Binay pa hinoon ang matawag nga ilado ug posible nga may kapasidad nga mopalihok og mga makinarya ug makagamit og mga tinubdan aron makalusad og pagpangampanya sa tibuok nasud.  Gipaabot pa ang pagsang-at nila ni kanhi DILG Secretary Mar Roxas kauban sa iyang runningmate nga si Camarines Sur Representative Leni Robredo ug ang kinatibuk-ang slate sa Liberal Party.

Gitakda nga karong adlawa ang mga mokandidato ubos sa LP dungan nga mosang-at sa ilang mga COC. Laing gihuwat mao ang pagsang-at og COC nila ni Senador Grace Poe ug sa iyang runningmate nga si Senador Chiz Escudero.

Laing gipaabot bisan kun namahayag na nga dili modagan pagka presidente mao si Davao City Mayor Rodrigo Duterte. Si Senador Allan Peter Cayetano, sa interview sa programa nga Headstart sa ANC, nilaum gihapon nga modagan sa pagka-presidente si mayor Duterte.

Apan ang laing nakapadani karon sa atensyon mao ang pamahayag ni Senador Miriam Defensor Santiago nga modagan siya pagka-presidente. Kini bisan pa sa bug-at nga balatian nga gihambin karon sa senador.

Nangangkon ang senador nga iya na nga nabuntog ang lung cancer ug napatay na ang mga cancer cells nga niatake sa iyang kalawasan. Sa Biyernes mao na ang deadline sa pagsang-at sa mga COC sa tanang buot magpapili alang sa eleksyon sunod tuig.

Gawas sa dako’ng garbo nga mahimong presidente sa nasud, unsa ba ang labing bug-at nga katungdanan sa usa ka presidente ngadto sa usa ka nasud sama sa Pilipinas nga gihuthotan?, kansang ekonomiya nag-aginod apan bahandi-anon pa unta.  Gisuwayan sa pagbangon, apan sa mga tawo nga nipahimulos ra usab  sa gahum ug naniguro lang sa ilang kaugalingon?

Si Presidente Aquino kanunay mopahimug-at sa "Daang Matuwid" sa tinguha nga pinaagi sa tul-id nga pamunoan, mapalambo ug mosutoy ang pag-asenso sa Pilipinas. Butang nga gustong ipadayon ni LP standard bearer Mar Roxas.

Apan si Senador Santiago, nga kaniadto ug hangtud karon giila nga graft buster, namahayag nga kinahanglan siya nga modagan bisan kun makaduha na napilde sa iyang pagsuway sa pagka-presidente.

Matud niya nga ang nasud karon gipalibotan sa mga tawo nga naghigwaos nga makapangurakot, nga kun motan-aw ka sa imong tupad, lami kaayo nimo siya nga hanggapon ug kan-on, sama sa cancer. Ang paggukod ba sa mga kurakot nga anaa sa gobiyerno ang nag-unang responsibilidad sa usa ka presidente? O ang pagpatunhay ba sa tul-id nga dalan?