Dear Atty. Divine,
Duna ko’y problema sa spelling sa akong middle name kay wala magkatukma ang akong middle name sa school records ug sa akong Birth Certificate. Ang husto g’yud nga spelling mao ang anaa sa akong school records mao nga gusto unta nako nga usbon ang sayop nga spelling sa akong middle name sa Birth Certificate kay aron makakuha ko og passport. Unsa may akong buhaton aron mausab ang spelling sa middle sa akong Birth Certificate? Kinahanglan pa ba ni nga moagi sa korte? Dali ra ba ni ma-process nila? — Judie
Dear Judie,
Kun spelling ra ang imong kurihian sa imong middle name sa Birth Certificate, dili na kinahanglan nga iagi pa na sa korte. Mopasaka ra ka og Petition for Correction of Entry sa imong Birth Certificate ngadto sa Local Civil Registrar diin ka marehistro ug sila na ang mo-process niana. Ang una nimo nga buhaton karon mao ang pag-adto sa Local Civil Registrar ug pangayo kanila og listahan sa mga requirements alang sa pagpa-correction sa imong Birth Certificate. Kun imo na nga makompleto ang ilang mga rekisitos, then imo dayon nga i-submit sa Local Civil Registrar uban sa imong Petition for Correction of Entry sa imong Birth Certificate. Sa akong nahibaw-an, ang filing fee niana P3,000 plus aduna pa’y publication fee. Mas dali ang proseso niini kay anha ra man sa Civil Registrar apan posible nga molungtad ‘sab g’yud og pipila ka buwan kay iduso pa man kini nila ngadto sa ilang ulohang buhatan. Mas maayo ‘sab nga human sa imong pag-file imo lang ‘sab kanunayon sa pag- follow-up. - Atty. Divine
Alang sa inyong pangutana may kalabutan sa problema’ng legal, ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules ug Domingo