EDITORYAL - Hagit ngadto sa DOLE

Ang mga mamumuo dinhi sa Metro Cebu nga nagdawatan lang og minimum nga suholan kinahanglan nga sweldohan na og P353 ang matag adlaw sugod kaniadtong Sabado.

Kini base sa kamandoan sa Regional Tripartite Wages and Productivity Board (RTWPB). Ang mga agawon wala pugsa paghatag og P13 nga usbaw sa suweldo sa ilang mga kawani matag adlaw kun nagdawat na sila og subra sa minimum.

Makapalipay kining mao nga balita sa mga “minimum wage earners” apan wala kini pulos kun ang kadagkoan sa Department of Labor and Employment (DOLE) dili mohimo’g lakang sa mga agawon nga dili motuman sa kamandoan.

Dili imposible nga daghan pa kaayo sa mga agawon ang wala makatuman sa gimando kaniadto nga usbaw sa suholan. Tungod sa kapait sa pagpangita’g trabaho, ang mga hingtungdang kawani miutong lang ug wala na lang moreklamo.

Kun estrikto lang ang kadagkoan sa DOLE paghimo og pakisusi, daghan sa mga agawon ang ilang masakpan nga wala mohatag og husto nga sweldo sa ilang mga trabahador.

Tinuod, si DOLE Regional Director Exequiel Sarcauga miawhag sa mga mamumuo nga tagdon dayon ang ilang reklamo kun wala sila hatagi sa tukma nga kantidad sa suholan.

Klaro kuno kaayo nga ang mao nga mga agawon nakalapas sa Republic Act 6727 nga gihimoan og kausaban sa Republic Act 8188, kon Wage Rationalization Act, kun dili sila mohatag sa gilatid nga suholan.

Apan ang kahadlok sa hingtungdang trabahador nga mawad-an sila og trabaho kun mosumbong sa gihimo sa ilang mga agawon maoy dako’ng problema ug nag-una nga rason nga moduko na lang sila sa pangabuso ngadto kanila.