Tun-i ang isyu pag-ayo

Dunay usa ka tawo nga wala makagusto nga ang mga maglilindog sa mantalaan ug magsisibya sa radyo mopadayag og pagdapig sa usa ka kandidato.

Usa sa wala magustohi sa mao nga tawo kay gihulagway wala dapigi sa kulumnista ang iyang paborito nga kandidato diha sa Mandaue.

Akong nasabtan sa iyang suwat nga wala siya malipay nga usahay mahimong sentro sa hisgotanan si Kongresista Luigi Quisumbing nga nagplano sa pagdagan pagka mayor.

Ang iyang argumento mao nga ang mga maglilindog nga wala magpuyo sa lugar sa dapit nga daganan sa gusto nga magpapili wala’y katungod nga mohisgot sa isyu.

Puwerte kaayo ang iyang paglaban ni Quisumbing kang kansang Priority Development Assistance Fund (PDAF) gikuwestiyon sa Commission on Audit (COA) tungod kay adunay nahipunta sa wala’y klaro nga NGO.

Wala tingali makabasa ang maong tawo nga ang balita napublikar kini “Page 1” pa sa usa ka nasudnong mantalaan. Mao kini ang among gibatbat nga angay’ng ipatin-aw ni Quisumbing ang mao nga isyu.

Adunay mitug-an kanako nga ang ngalan sa nagpadala gihimo-himo ra. Awhagon nako ang maong tawo nga makigkita personal ug dad-on niya ang iyang “proof of identification.”

Sayod ko kinsa ang nagsugo nimo.

* * *

Iya usab nga gikuwestiyon ang paghimo nato og kumentaryo nga si Senador Grace Poe dili pa haum nga mag presidente sa nasud.

Duha pa lang ka tuig si Poe nga nahimo’ng senador ug wala pa siya makagunit og puwesto pagka secretary sa mga departments sa kagamhanan.

Mao kana ang rason nga kun ang kasinatian maoy basehan sa pagboto ug pagpili’g kandidato, mas angayan si Mar Roxas kay ni Poe.

Ambot, kun ang nagpadala sa suwat mosakay og sakyanan unya nasayod siya nga ang mo-drive dili maantigo momaneho, mosakay ba kaha siya?

Kini maoy gibalik-balik nako sa pagpasabot nga kun sakyanan ang gamiton nato nga ehemplo, si Grace Poe angay usa nga mag-konduktor ni Mar Roxas.

Inigkahuman sa termino ni Mar Roxas, diha nga bahina bansay na usab nga mo-drive si Grace Poe ug angay na nato nga saligan pagdumala sa nasud.

* * *

Kun tinuod ang gisulti ni kanhi kongresista Tomas R. Osmeña nga dili na modayon pagdagan si Rodrigo Duterte, sa ato pa tulo g’yud ka kandidato ang magtigi sa pagka presidente.

Ang ikatulo, mao si Vice President Jejomar Binay, apan sayod na man kita nga nalukapa na si Binay tungod sa pasangil sa kurapsyon nga wala pa g’yud niya mahatagi og katin-awan.