Nagsige na og balik dinhi sa Sugbo si Senador Grace Poe ug iya na nga gitakintakin sa iyang mga pagbiyahi ang iyang paborito’ng senador nga si Chiz Escudero nga iyang gipili nga kandidato pagka bise presidente.
Klaro ug dayag na kaayo kanato nga ang tumong ni Poe sa iyang pagsige og balik dinhi sa Sugbo mao ang pagpangulitawo sa boto sa mga Sugboanon.
Napulo na ka tuig ang nakalabay human gilubong og usa ka milyon nga boto sa mga Sugboanon si Fernando Poe Jr. nga gipilde ni Gloria Macapagal-Arroyo.
Gitulisok ug gisinggit ni Grace Poe sa tibuok kalibotan nga ang mga Sugboanon tikasan. Sa Sugbo gitikasan kuno si Fernando Poe Jr. Unya karon nagsige na siya og balik dinhi sa Sugbo kay mangayo sa atong boto?
Ako ning gisuwat dinhi ug ako na usab kining nahisgotan sa akong duha ka programa sa DySS Super Radyo Cebu aron kamo mahinumdom kay basin og nakalimot na mo nga kita’ng mga Sugboanon gipasanginlan ug gitawag ni Grace Poe kaniadto nga mga tikasan o limbongan.
Pahinumdom pud ni nako ngadto kang Grace Poe kay basin pud og siya nalimot kay kita ra ba nga mga Pinoy dali ra kaayo nga makalimot. Madam Senator, mangayo diay ka og boto sa mga tikasan?"
Si Grace Poe ug Chiz Escudero gusto nga magpapili pagka pangulo ug ikaduha nga pangulo sa nasud. Kun sila ang mapili ako nakuyawan kay basin og kita ilang biyaan kay napamatud-an na ra ba nga mamiya g’yud ni sila.
Gibiyaan ni Grace Poe iyang pagka Filipino kay nag Amerikano samtang si Senador Chiz Escudero iyang gibiyaan ang iyang asawa ug anak kay nakigminyo ni Heart. It hurts no?