Ang katawhan dinhi sa dakbayan ug sa probinsya sa Sugbo angay’ng mopasigarbo tungod kay daghan ang miisip kanila nga mga “wise voter.”
Nagpasabot nga maayo sila nga mopili og mga kandidato ug mao man gani nga daghang politiko nga anhi gayud sa Sugbo mohingusog sa ilang pangampanya.
Si kanhi Presidente Arroyo dinhi sa Sugbo nanumpa sa iyang katungdanan human sa iyang kadaugan kaniadto tungod sa iyang kalipay nga dinhi niya makuha ang daku kaayong botos nga maoy nakapadaog kaniya.
Apan daghan pa nga mga botante nga padayong mobotar sa kinatibuk-ang han-ay sa mga kandidato sa usa lang ka partido nga ilang gilabanan.
Klaro kaayo nga sila wala masayod nga dili tanan nga kandidato sa usa ka politikanhong partido nga nakabentaha sa ilang mga kaatbang.
Nagpasabot nga mas bentaha gayud nga ang usa ka botante mopili og mga kandidato gikan sa lainlaing partido nga adunay igo nga katakus sa pagserbisyo.
Mas nindot nga ang mga opisyal nga atong tugyanan sa pagserbisyo sa kagamhanan managlahi og partido nga gigikanan kay aron magbantay sila sa kada usa.
Angay’ng sutaon sa mga botante kun ang ilang nagustohan nga kandidato takus ba nga mohupot sa puwesto nga gusto nila nga huptan.
Sama pananglit kun ang usa ka kandidato magpapili sa pagka konsehal o kongresista, apan wala siya’y abilidad nga maayo mopasabot sa buot niya pandayon nga balaudnon ug supakon ang dili maayo.
Angay’ng gamiton gayud sa mga botante ang ilang utok aron makapili sila og tukma nga mga tawo nga angay sa usa ka puwesto.
Kini aron nga ang mga Sugboanon pabilin nga daygon sa uban ug isipon nga wise voter.