EDITORYAL - Unya na lang

Daghan kaayong gibuhat nga mga pamaagi o programa ang Comelec aron lang gyud masiguro nga dili magdasok sa ilang mga buhatan ang mga magpa-rehistro nga nag-apas sa deadline.

Gipaninguha sa Comelec nga daghan ang makabotar matag adunay umaabot nga eleksyon kini tungod kay sila man kanunay maoy basulon kay wala kuno sila makabotar kay kuwang ang oras nga gihatag sa Comelec sa pagpangrehistro.

Karon nga piniliay, di na makabotar kadtong mga wala pa magpakuha og biometrics, nagpasabot kini nga bisan nakabotar sa nakalabay nga eleksyon apan wa gihapon magpa-biometrics di gihapon makabotar. Busa gipatuman sa Comelec ang early registration, dayon hasta ang adlaw nga Domingo abli ilang buhatan aron pagdawat og mga magparehistro, apan wala gihapon kini mosalir kay menus gihapon ang nagparehistro.

Tungod niini, gipatuman nila ang satellite registration nga diin ang mismo nang Comelec ang miadto sa mga barangay ug nagbutang og registration booths apan mao lang gihapon walay epekto.

Karon aduna na silay plano nga  sud na mismo sa mga dapit nga suroyanan sa mga tawo sama sa malls himuon ang pagpangrehistro. Hinuon plano pa lang kini kay wala pay approval gikan sa Comelec sa kaulohan.

Kaniadto pirmeng pasanginlan ang Comelec nga nagdawat og dagkong sweldo apan way gibuhat sud sa pipila ka tuig kay panahon ra sa eleksyon sila molihok maong kuwang pirme ang ilang gihatag nga oras aron makaparehistro ang mga botante.

Karon,  syaro og basulon gihapon ang Comelec sa kadaghan na og kapiliang pamaagi sa pagparehistro o basin gusto pa gyud nga house-to-house registration ang ilang gusto. Sobra na pud ni.

Kung buot tan-awon wa magkulang ang Comelec sa ilang trabaho niining bag-o nilang mga programa.  Ang kinaiya na lang gyud siguro sa mga Pilipino nga "unya na lang" maoy problema.