Killer fireworks!

Kaniadto yano ra man kaayo ang pagsaulog sa kapistahan ilabi na sa mga barrio diin makontento na ang mga tawo sa pagsadsad ug pag-ikid-ikid sa mga baylehan ug uban pa nga mga inato ra kaayo nga kalingawan.

Apan karon sophisticated na kaayo ang mga selebrasyon nga mura’g nahimo na nga kabahin ang gitawag nila nga "fireworks display" isip opening salvo o finale sa mga mahinungdanong kalihokan sa mga tawo sama sa pangilin o fiesta.

Niadtong Lunes sa gabii excited ang mga tumatan-aw sa naandan na nga fireworks display sa bisperas sa kapistahan sa barangay San Miguel sa lungsod sa Cordova.

Apan kini ang nahimo nga trahedya human mamatay ang otso-anyos nga si Sam Monteron dihang nabuthan sa mikagar nga pyrotechnics.

Nasuta sa mga otoridad ang daghan kaayong sipyat, dili lang ang duha ka lalaki nga midagkot, kun dili mas dako og kalapasan ang tag-iya kinsa maoy nagsugo sa pagdagkot sa fireworks tungod kay ni-expire na ang  permit sa iyang negosyo.

Samtang wala usab sila makig-alayon sa mga otoridad sama sa kabomberohan o sa kapolisan aron magiyahan unta  sa ilang himoon ug malikayan ang mga posibleng disgrasya.

Bisan na lang unta sa mga barangay tanod s’yaro og wala makabadlong sa mga tawo, ilabi na sa mga bata, nga mopalayo sa dapit diin gidagkotan ang fireworks?

Labaw sa tanan ang mga ginikanan kinahanglang monitoron ang mga anak ilabi na kong adunay dakong kalihokan aron maseguro nga luwas gikan sa disgrasya ang mga bata.

Pahinumdom lang sa tanan kay basin og nanghinubra na ang kahigwaos nga motan-aw sa kaanindot sa fireworks display, nalimot na hinoon sa peligro nga mamugna niini ngadto sa mga tawo.