Kagustohan diay ni Mike

Nahimong kontroversiyal ang P112,500 nga financial assistance sa Cebu City government ngadto sa Abella clan alang sa reunion niini. Una nang gipiit si Konsehal Gerry Carillo kay usa kini ka dakong haligi sa Abella clan.

Ang pagsaway nagsentro sa kahimilian sa siyudad kinsa nga dakong pamilya ang tabangan. Una usa ka dakong clan ang mga Abella ug nanganak kini og laing daghang apilyedo. Ikaduha, nganong ang Abella clan lang ang gitagaan, nganong wala man ang uban.

Pero dili kini maoy isyu. Ang isyu niini kinsay nagbuot sa P112,500 alang sa Abella clan reunion?

Usa ka dokumento naabot sa atong email. Kini usa ka Memorandum No. 20150040 nga gi-address sa heads sa accounting, local finance committee ug sa ubang hingtungdan ug nag-ulohan "Budget Execution Guidelines and Instructions for AB CY 2015" nga gipirmahan ni Mayor Mike Rama ug pinetsahan Enero 29, 2015.

Nakabutang sa ikaduhang pahina ang "5.0 Specific Guidelines" diin gisumada sa mayor ang pito ka gitawag og "city-sponsored activities." Ug nakabutang sa ika-unom ang "Abella Clan Grand Reunion - P112,500.

Sa kinaubsan sa ikalima'g katapusang pahina ang pirma ni Mike isip mayor.

Masabot sa maong dokumento nga si Mike diay ang nagbuot nga papahatan og P112,500 gikan sa budget sa siyudad ang reunion sa Abella clan.

Taym pa ra gud, nganong wala man iapil sa pagsumada ni Mike ang ubang clan aron parehason pud niya sa mga Abella?

Unsa man kining kang Mike, pamolitika? Abi kay baga nga pamilya ang mga Abella, mao nga iya kining gipaboran? Dili ba kini "graft," Mike?

* * *

Nabutang karon sa hotseat si Supreme Court Associate Justice Antonio Carpio tungod sa iyang pagpangulo sa Senate Electoral Tribunal nga naminaw sa disqualification case batok kang Senador Grace Poe.

Ang wala nako mahiuyoni, gisaway si Carpio sa iyang pag-ingon nga alkanse si Poe tungod sa mga ebidensiyang dili gyud siya natural-born Filipino nga maoy usa sa mga rekisitos sa pagka-senador. Kinsa may maayong sawayon, si Carpio nga usa ka Pilipino nga andam motug-an sa tinuod nga status ni Poe o si Poe nga dili Pilipino unya namakak pa gyud sa iyang certificate of candidacy niadtong 2013 pagtug-an nga usa siya ka natural-born, bisan dili?

Kagahapon, gibalita nga si Carpio mibotar usab diay sa pagpa-disqualify ni Fernando Poe Jr. niadtong 2004. Ug ang artikulo nangutana kun moboto ba karon si Carpio pagpa-disqualify kang Grace Poe.

Pastilan, dili man nato matudloan si Carpio unsay iyang baruganan.

Nganong si Carpio man ang sawayon nga nagsulti ra man siya sa tinuod? Nganong dili man sawayon si Grace kinsa makausa mibiya sa Pilipinas aron mag-Amerkana unya namakak sa COC aron ma-senador, unya karon gusto pa gyud mag-presidente.

Bakakon nga presidente? No way!