EDITORYAL – Sumbanan sa media

Nagplano karon si Cebu City Councilor Gerardo “Gerry” Carillo nga ikiha niya sa hukmanan ang usa ka radio blocktime commentator nga mihingalan kaniya og corrupt.

Katungod ni Carillo nga panalipdan ang iyang dungog kun nagtuo siya nga buot kini buling-bulingan sa usa ka tawo, ilabi na kay mokandidato ra ba siya sa umaabot nga eleksyon.

Ang ubang sakop sa media didto sa Mindanao miingon nga bentaha na lang dinhi sa Sugbo kay ang mga tawo nga atakehon sa media, modangop ra man sa korte, dili sama sa ilang dapit nga patyon g’yud ang media nga mohimo’g grabe nga pangatake.

Didto unya sa hukmanan, kahatagan og higayon ang akusado nga pamatud-an ang iyang pasangil nga corrupt ang opisyal nga iyang gipasanginlan. Unya, ang opisyal makadepensa usab sa iyang kaugalingon. Ang paghimo og mga kumentaryo diha sa radyo ug lindog sa mga mantalaan, angay nga ibalanse g’yud. Dili kay magpasagad lang.

Tinuod nga ang Article III sa atong Konstitusyon naghatag sa katawhan og katungod “Freedom of Speech” apan wala kini magpasabot nga gitugotan na siya aron dauton ang kadungganan sa iyang isigkatawo. Ang Article 353 sa Revised Penal Code naglatid nga makunbikto og “libel” ang usa ka tawo nga mohimo’g pagpakauwaw sa iyang isigkatawo, bisan pa og ang iyang gisulti tinuod.

Adunay mga hukom sa Korte Suprema nga nagkanayon “Truth is not a defense of Libel.” Bisan og ang usa ka tawo nakunbikto pa sa pagpangawat, apan ibandilyo gayud nimo sa kadaghanan ang iyang pagka kawatan, ang naghimo niini makunbikto og libel. Ang tukma mao nga ang binuhatan maoy sawayon ug dili ang pagkatawo. Kinahanglang magmatngon sa mga lingguwahe nga gamiton aron malikayan ang kaso.