Mopalit og yuta nga wa’pa mabahin sa mga heirs

Dear Atty. Divine,

May gitanyag nako nga yuta, apan portion lang. Ang original owner, ang lola, apan patay na ug titulado g’yud ang maong property sa pangalan sa ilang apohan. Usa sa mga apo aduna’y bahin nga 500 square meters ug ang 200 square meters niini iyang gitanyag nga ibaligya ngari nako. Unsa may among buhaton sa dili pa namo kini paliton kay tibuok pa man ang yuta ug wa pa mabalhin sa mga heirs? — Jiggy

Dear Jiggy,

Tungod kay ang property nga gusto nimong paliton nakapanga’n pa man sa original owner nga patay na, ang dokumento nga inyong ipahimo mao ang Extrajudicial Partition with Sale sa portion ug kini papirmahan sa tanang mga heirs. Kinahanglan nga i-describe g’yud kun asa dapita ang portion nga imong gipalit. Apan sa dili pa nimo paliton, mas maayo nga mokuha ka og Certified True Copy sa Title aron imong masusi kun nakapangan pa ba g’yud ni sa iyang lola ug wa ba’y mga annotation ang titulo niini sa Register of Deeds, mokuha ‘sab ka og Certified True Copy sa Tax Declaration aron imong mahibaw-on kun asa nakapangan ang Tax Dec ug mangayo ‘sab ka og Tax Clearance aron imong mahibaw-an kun nabayran ba ang buhis. Mas maayo ‘sab nga mangayo ka og listahan sa BIR sa mga requirements sa pagbayad og Estate Tax ug Capital Gains Tax kay inig process nimo sa pagpa-transfer sa titulo sa portion nga imong napalit magbayad man ka og Estate Tax, lakip na sa Capital Gains Tax ug Documentary Stamp Tax. Kun magpa-issue ka og separate Title, then imong ipa-survey ang lot ug imong pa-aprobahan sa Bureau of Lands. –Atty Divine

 Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana matag Miyerkules ug Domingo pinaagi sa akong column.