Pagbantay sa peke nga fire inspector

Dili na gyud kita mokumpiyansa karong mga panahona kay kun nakabantay kamo, sagunson na ang mga pagpangawat ug patay nga anha mismo himuon sa panimalay.

Nagkaagresibo na gayud ang mga dautang elemento sa katilingban gumikan kini sa mikuyanap nga ilegal nga drugas. Ako kini nga nahisgotan kay duna’y makaalarma na kaayong report nga among nadawat diin may mga tigpakaaron-ingnon nga sakop sa Bureau of Fire Protection (BFP) nga nagsuroy-suroy sa kabalayan kay mag-conduct kuno og home fire safety inspection.

Niadtong Septiyembre 18, may nadawat kami nga report nga tulo ka lalaki nga nag-barong nakasulod sa DECA Homes, Minglanilla nga nagpaila nga bombero nga maghimo kuno og inspeksyon.

Maayo na lang kay may kauban kami nga didto ug maoy nangutana sa maong mga lalaki kun diin sila madestino. Wala’y klaro nga tubag. Gipahibawo sa among kauban ang mga guwardiya aron kini masita.

Nakamatikod ang maong mga lalaki nga nabantayan sila mao nga misibat. Ang inyong kabomberohan gitahasan sa balaod nga mo-conduct og fire safety inspection sa tanang edipisyo, panimalay ug uban pa nga estraktura.

Ayaw kamo kahibulong nga bisan sa panimalay adunay mga bombero nga moanha ug mag-inspeksyon. Apan pahimangno namo sa publiko nga isiguro ninyo nga lehitimo’ng sakop sa BFP ang inyong gipasulod.

Una, pangutan-a ninyo ang pangalan ug pangayoi ug ID aron masuta ninyo nga sakop kini sa BFP. Ikaduha, tan-awa kun may dala ba sila nga Inspection Order nga gipirmahan sa City Fire Marshal o Municipal Fire Marshal.

Sa kataposan, kinahanglan nga nag-uniporme kun mag-conduct sila og fire safety inspection. Kinahanglan nga magmatngon kita aron dili mabiktima sa pagpangawat o ba kaha duna’y laing krimen nga mahitabo sulod sa atong panimalay.