Daghang mga nanggawas nga balita kabahin sa giingong pagpabalik sa mga Amerikano dinhi sa Pilipinas tungod sa hulga karon sa China dinhi sa nasud . Ang pangutana, unsa man nga klaseha nga pagbalik ang gipasabot. Dunay mga dili makatarunganong mga komento nga nanggawas sa nagkadaiyang forums ug komentaryo sa mga online news reports diin gisaway ang Pilipinas ug sa gobiyerno niini tungod niini.
Hinuon sayop ang maong pangagpas ug tataw kaayo nga ang naghimo-himo niini nga mga klase sa balita kuwang og research o ba kaha nanuyo lang gyud aron adunay estoryahan bahala og makamugna og kalibog sa mga tawo.
Maayo na lang nga giklaro kini sa Malacañang nga di kini mahitabo kay sa 1986 Philippine Constitution ang pagtukod og base militar sa mga langyaw dinhi. Kung buot tan-awon, wala na kinahanglana pang pabalikon dinhi ang mga base militar sa Amerika. Aduna nay Mutual Defense Treaty, Visiting Forces Agreement ug karon gipalig-on pa kini pinaagi sa Enhance Defense Cooperation Agreement tali sa Pilipinas ug Amerika.
Bisan ang Amerika dili na mosugot nga magbutang og permanenteng base dinhi tungod sa kadako sa gikinahanglang budget pagtukod og fully operational forward bases ug pag-mentinar niini.
Ang VFA ug EDCA paigo na sa mga Amerkano kay makadunggo man ilang mga barko ug makatugpa ilang mga abyon dinhi kun may pagtugot sa gobiyerno.
Sa report sa The Philippine Star kagahapon, si US Assistant Defense Secretary David Shear miingon nga mokabat na og 300 milyones dolyares ang hinabang nga ilang nahatag sa militar sa Pilipinas sukad niadtong tuig 2001.
Angay pa gani ipasalamat nga matag bisita sa mga Amerkano dinhi adunay mga civic projects silang gihimo gikan sa pagtukod og mga eskuylahan, klinika, karsada, artesian wells, ug uban pang imprastraktura nga mapuslan dili lang sa militar kondili hasta sa publiko.